കൊയിലാണ്ടി: കുറുവങ്ങാട് മണക്കുളങ്ങര ക്ഷേത്രത്തില്‍ ആന ഇടഞ്ഞ സംഭവത്തില്‍ ആറു പേര്‍ പ്രതികള്‍. ഇതു സംബന്ധിച്ച് 
സോഷ്യല്‍ ഫോറസ്ട്രി കോഴിക്കോട് ഡിവിഷന്‍ പേരാമ്പ്ര കോടതിയില്‍ റിപ്പോര്‍ട്ട് സമര്‍പിച്ചു. വന്യജീവി സംരക്ഷണ നിയമപ്രകാരവും നാട്ടാന പരിപാലന ചട്ട പ്രകാരവും കേസെടുത്തതായി റിപ്പോര്‍ട്ടില്‍ പറയുന്നുണ്ട്.
ക്ഷേത്രഭാരവാഹികള്‍, ആനപാപ്പാന്മാര്‍ ഉള്‍പ്പെടെ ആറു പേരെ പ്രതി ചേര്‍ത്താണ് റിപ്പോര്‍ട്ട് നല്‍കിയത്. പടക്കം പൊട്ടിച്ചു, ആനയുടെ ഇടച്ചങ്ങലവേണ്ട രീതിയില്‍ കൈകാര്യം ചെയ്തില്ല, ആനയെ പരിപാലിക്കുന്നതിലും എഴുന്നള്ളിക്കുന്നതിലും അശ്രദ്ധ കാട്ടി എന്നിവയാണ് കുറ്റം. ഫോറസ്റ്റ് ഓഫീസര്‍ എന്‍.കെ.ഇബ്രായി ആണ് മഹസര്‍ തയാറാക്കിയത്. ആഘോഷ കമ്മിറ്റി ഭാരവാഹികളും പീതാംബരന്‍, ഗോകുല്‍ എന്നീ ആനകളുടെ നാലു പാപ്പാന്മാരെയും പ്രതികളാക്കിയാണ് കേസ്.
സ്ഫോടക വസ്തുക്കള്‍ അലക്ഷ്യമായി കൈകാര്യം ചെയ്ത കുറ്റം കൂടി ചേര്‍ത്താണ് പോലീസ് കേസെടുത്തിരിക്കുന്നത്. നേരത്തെ 
അസ്വാഭാവിക മരണത്തിന് മാത്രമായിരുന്നു പോലീസ് കേസ്.
അതേസമയം ഉത്സവത്തിനിടെ ഇടഞ്ഞ ഗുരുവായൂരിലെ ആനകളായ പീതംബരനും ഗോകുലിനും കോഴിക്കോട് ജില്ലയില്‍ വിലക്ക് ഏര്‍പ്പെടുത്തി. ജില്ലാ മോണിറ്ററിംഗ് കമ്മിറ്റിയാണ് പീതംബരനേയും ഗോകുലിനേയും ക്ഷേത്രങ്ങളില്‍ എഴുന്നള്ളിക്കുന്നതിന് സ്ഥിരം വിലക്കേര്‍പ്പെടുത്തിയത്.
ഉത്സവങ്ങളില്‍ ആനകളെ എഴുന്നള്ളിക്കാന്‍ ഒരുമാസം മുന്‍പ് അപേക്ഷ നല്‍കണമെന്നും ക്ഷേത്രങ്ങള്‍ക്ക് നിര്‍ദേശം നല്‍കിയിട്ടുണ്ട്. കഴിഞ്ഞ വ്യാഴാഴ്ചയാണ് കുറുവങ്ങാട് മണക്കുളങ്ങര ക്ഷേത്രോത്സവത്തിനിടെ ആനയിടഞ്ഞത്. അപകടത്തില്‍ കെട്ടിടം തകര്‍ന്നും ആനയുടെ ചവിട്ടേറ്റും മൂന്ന് പേര്‍ മരിച്ചു. 30 പേര്‍ക്ക് പരിക്കേറ്റു.
-സുധീര്‍ കൊരയങ്ങാട്
