കോട്ടയം: മലയാള സിനിമയില് പോലിസ് വേഷങ്ങളിലൂടെ ശ്രദ്ധേയനായ നടന് രാജശേഖരന് അന്തരിച്ചു. കോട്ടയം ചിങ്ങവനത്തെ വസതിയിലായിരുന്നു അന്ത്യം. മലയാള 
സിനിമയില് കൂടുതല് തവണ പോലിസ് ഇന്സ്പെക്ടറായി വേഷമിട്ട നടന്മാരിലൊരാളെന്ന നിലയില് ‘എസ്ഐ രാജശേഖരന്’ എന്നാണ് അദ്ദേഹം സിനിമാലോകത്ത് അറിയപ്പെട്ടിരുന്നത്. വില്ലന് വേഷങ്ങളിലും പോലിസ് വേഷങ്ങളിലുമാണ് അദ്ദേഹം തിളങ്ങിയത്. ജോഷി സംവിധാനം ചെയ്ത ചിത്രങ്ങളിലെ സ്ഥിരസാന്നിധ്യംകൂടിയായിരുന്നു രാജശേഖരന്. എണ്പതുകള് മുതല് മലയാള സിനിമയില് സജീവമായിരുന്നു. വില്ലന് വേഷങ്ങളിലും പോലിസ് ഉദ്യോഗസ്ഥനായും സഹനടനായും നിരവധി ചിത്രങ്ങളില് 
അദ്ദേഹം മികച്ച പ്രകടനം കാഴ്ചവെച്ചു.
രാജാവിന്റെ മകന്, സന്ദര്ഭം, മുദ്ര, നായര് സാബ്, സേതുരാമയ്യര് സിബിഐ, താപ്പാന തുടങ്ങിയ ഒട്ടനവധി ഹിറ്റ് ചിത്രങ്ങളില് അഭിനയിച്ചിട്ടുണ്ട്. സന്ദര്ഭത്തിലെ പോലിസ് ഇന്സ്പെക്ടര്, രാജാവിന്റെ മകനിലെ ആഭ്യന്തര മന്ത്രി എന് കൃഷ്ണദാസിന്റെ സഹായിയായ സാബു, വഴിയോരക്കാഴ്ചകളിലെ ഡോക്ടര്, മുദ്രയിലെ ജുവനൈല് ഹോമിലെ പോലിസ് കോണ്സ്റ്റബിള്, നായര് സാബിലെ ജെയിംസിന്റെ സഹായിയായ ഉലഹന്നാന്, സേതുരാമയ്യര് സിബിഐയിലെ കണ്ണൂര് സെന്ട്രല് ജയിലിലെ ജയിലര് രാജു, താപ്പാനയിലെ പോലിസ് ഇന്സ്പെക്ടര് എന്നിങ്ങനെ വൈവിധ്യമാര്ന്ന നിരവധി കഥാപാത്രങ്ങളിലൂടെ പ്രേക്ഷകരുടെ 
മനസ്സില് അദ്ദേഹം തന്റേതായ ഇടം കണ്ടെത്തിയിരുന്നു.
ഇവ കൂടാതെ നമ്പര് 20 മദ്രാസ് മെയില്, പാറശ്ശാല പാച്ചു, പയ്യന്നൂര് പരമു തുടങ്ങിയ നിരവധി ചിത്രങ്ങളിലും അദ്ദേഹം വേഷമിട്ടിട്ടുണ്ട്. 2015ല് പുറത്തിറങ്ങിയ ഒരു സെക്കന്ഡ് ക്ലാസ് യാത്രയിലാണ് അദ്ദേഹം അവസാനമായി അഭിനയിച്ചത്. സിനിമാരംഗത്തിന് പുറമെ നിരവധി ടെലിവിഷന് സീരിയലുകളിലും അദ്ദേഹം സജീവമായിരുന്നു. ചലച്ചിത്രമേഖലയ്ക്ക് അകത്തുനിന്നും പുറത്തുനിന്നുമായി നിരവധി പേര് രാജശേഖരന് ആദരാഞ്ജലിയര്പ്പിച്ചു. മമ്മൂട്ടി സോഷ്യല് മീഡിയയിലൂടെ രാജശേഖരന് അന്ത്യാഞ്ജലിയര്പ്പിച്ചു.
