കൊയിലാണ്ടി: കൊല്ലം മുതല്‍ പാറക്കല്‍ താഴെ വരെയുള്ള പതിമൂന്നോളം അരയസമാജങ്ങളുടെ കൂട്ടായ്മയായ തീരദേശ 
ഹിന്ദുസംരക്ഷണ സമിതി വിവിധ ആവശ്യങ്ങള്‍ ഉന്നയിച്ച് എംഎല്‍എയ്ക്ക് നിവേദനം നല്‍കി. കൊയിലാണ്ടി ഹാര്‍ബര്‍ മുതല്‍ പാറക്കല്‍ താഴ ലക്ഷം വീട് കോളനി വരെയുള്ള തിരദേശ റോഡ് പൊട്ടിപ്പൊളിഞ്ഞ് കുണ്ടും കുഴിയുമായി ഗതാഗതയോഗ്യമല്ലാതായിട്ട് വര്‍ഷങ്ങളായി. കാല്‍നട പോലും ദുരിതപൂര്‍ണമായ ഇവിടെ വര്‍ഷ കാലങ്ങളില്‍ റോഡ് തോടായി മാറുന്ന അവസ്ഥയാണ്. പല രീതിയിലുള്ള പ്രക്ഷോഭങ്ങള്‍ ഇതിനോടകം നടത്തിയിട്ടും യാതൊരു പരിഹാരവും ഉണ്ടായിട്ടില്ല.
ദിവസേന ആയിരക്കണക്കിന് മത്സ്യത്തൊഴിലാളികള്‍ ഹാര്‍ബറിലേക്കും തിരിച്ചും സഞ്ചരിക്കുന്ന പാതയാണ് ഇത്. എന്നാല്‍ അധികൃതരുടെ ഭാഗത്ത്‌നിന്നും എംഎല്‍എയുടെ ഭാഗത്തു നിന്നും തികഞ്ഞ അവഗണനയാണ് ഈ പ്രദേശത്തുകാരോട് കാണിക്കുന്നത്. കൊല്ലം അരയന്‍കാവ് -കൂത്തംവള്ളി ഭാഗത്തുള്ള മത്സ്യത്തൊഴിലാളികള്‍ക്ക് ഹാര്‍ബറിലെത്തണമെങ്കില്‍ 
കൊയിലാണ്ടി നഗരത്തിലെ ഗതാഗത കുരുക്ക് മറികടക്കണം. കൊല്ലം തീരദേശത്ത് കുത്തംവള്ളി തോടിനും ചെറിയതോടിനും കുറുകെ പാലമില്ലാത്തതാണ് കാരണം.
ഹാര്‍ബര്‍ മുതല്‍ പാറക്കല്‍ത്താഴ ലക്ഷം വീട് കോളനിവരെയുള്ള തീരദേശ റോഡ് കുറ്റമറ്റ രീതിയില്‍ പുതുക്കിപ്പണിയാനും കൊല്ലം കുത്തംവള്ളി ഭാഗത്ത് തോടിനും ചെറിയതോടിനും കുറുകെ പാലം പണിയാനും വേണ്ട നടപടി അടിയന്തിരമായി സ്വീകരിക്കാനുള്ള ശ്രമം എംഎല്‍എയുടെ ഭാഗത്ത് നിന്നുണ്ടാവണമെന്നു തീരദേ ദേശഹിന്ദു സംരക്ഷണ സമിതി ആവശ്യപ്പെട്ടു. പരിഹാരം കണ്ടില്ലെങ്കില്‍ മല്‍സ്യതൊഴിലാളികളെ അണിനിരത്തി ബഹുജന പ്രക്ഷോഭങ്ങള്‍ നടത്തുമെന്നു സംഘടന മുന്നറിയിപ്പ് നല്‍കി. വി.വി.സുരേഷ് കുമാര്‍, വി.കെ.രാമന്‍, കെ.പി.എല്‍.മനോജ്, എം.വി.ശശി തുടങ്ങിയവരുടെ നേതൃത്വത്തിലാണ് നിവേദനം 
നല്‍കിയത്.
