വടകര: ബൗദ്ധിക വെല്ലുവിളി നേരിടുന്ന മകള്‍ സ്വരാത്മികയെ (14) ദിവസവും നാദാപുരത്തെ പാലിയേറ്റീവ് കേന്ദ്രത്തില്‍ തെറാപ്പി 
ചെയ്യാന്‍ കൊണ്ടുപോവുക എന്നത് അമ്മ സീമയെ സംബന്ധിച്ച് ഭാരിച്ച ജോലിയാണ്. മകളെ ആദ്യം എടുത്തു മതിലിന്മേല്‍ ഇരുത്തി, പിന്നീട് വഴിയില്‍ വന്നു വീണ്ടും എടുത്തുകൊണ്ടു വേണം ദുര്‍ഘടപാത താണ്ടാന്‍.
വീട്ടിലേക്ക്, വാഹനം പോകുന്ന വിധം കുറേക്കൂടി വീതിയുള്ള വഴി ലഭ്യമല്ലാത്തതാണ് പുറമേരി എസ്‌വി എല്‍പി സ്‌കൂളിന് സമീപം ‘ശ്രീലക്ഷ്മി’യില്‍ താമസിക്കുന്ന സീമയുടെ പ്രശ്‌നം. ഭിന്നശേഷിക്കാരിയായ മകള്‍ ഉള്ളതിനാല്‍ മറ്റ് എല്ലാ അയല്‍ക്കാരും വഴി വീതികൂട്ടാന്‍ അനുവദിച്ചില്ലെങ്കിലും ഒരാള്‍ മാത്രം സമ്മതിക്കുന്നില്ലെന്ന് സീമ പറയുന്നു. ‘അനുവദിക്കാത്ത ആളുടെ സ്ഥലം വീതി കൂട്ടാന്‍ ആവശ്യമില്ല. പക്ഷേ വീതി കൂട്ടിയാല്‍ അയാളുടെ സ്ഥലത്ത് മഴക്കാലത്ത് വെള്ളം കയറും എന്ന് പറഞ്ഞ് തടയുകയാണ്,’ 
അവര്‍ വിശദീകരിച്ചു.
വര്‍ഷങ്ങളായി ഇക്കാര്യം പറഞ്ഞു താന്‍ പലരെയും സമീച്ചെങ്കിലും സാങ്കേതിക കാരണങ്ങള്‍ പറഞ്ഞു അനന്തമായി നീട്ടുകയാണെന്നും അദാലത്തില്‍ വെച്ച് സീമ മന്ത്രി പി.എ.മുഹമ്മദ് റിയാസിനോട് പറഞ്ഞു. വിഷയത്തില്‍ പുറമേരി ഗ്രാമപഞ്ചായത്ത് സെക്രട്ടറിയോട് നേരില്‍ വിവരം ആരാഞ്ഞ മന്ത്രിയും ജില്ലാ കളക്ടറും വഴിയുടെ കാര്യത്തില്‍ പുന:പരിശോധന നടത്താന്‍ ആവശ്യപ്പെട്ടു.
സ്വരാത്മികയുടെ പ്രശ്‌നം ന്യായമാണെന്നും ഗ്രാമപഞ്ചായത്ത് തലത്തില്‍ മധ്യസ്ഥ ചര്‍ച്ചയിലൂടെ പ്രശ്‌നം പരിഹരിക്കാമെന്നും ജില്ലാ സാമൂഹ്യനീതി ഓഫീസറും അഭിപ്രായപ്പെട്ടു.
