കോഴിക്കോട്: മൂന്നാമത് കേരള നിയമസഭ അന്താരാഷ്ട്ര പുസ്തകോത്സവത്തിന്റെ ഭാഗമായി വിദ്യാര്‍ഥികള്‍ക്കായി സംഘടിപ്പിച്ച 
ക്വിസ് മത്സരങ്ങളില്‍ കോഴിക്കോട് മേഖലയില്‍ സ്‌കൂള്‍ വിഭാഗത്തില്‍ മേമുണ്ട എച്ച്എസ്എസ് ടീമും കോളജ് വിഭാഗത്തില്‍ മണാശ്ശേരി എംഎഎംഒ കോളജ് ടീമും ജേതാക്കളായി. കാരപ്പറമ്പ് ജിഎച്ച്എസ്എസില്‍ നടന്ന പരിപാടി തോട്ടത്തില്‍ രവീന്ദ്രന്‍ എംഎല്‍എ ഉദ്ഘാടനം ചെയ്തു. കോഴിക്കോട്, മലപ്പുറം, വയനാട് ജില്ലകളെ ഉള്‍പ്പെടുത്തി ഹൈസ്‌കൂള്‍/ഹയര്‍ സെക്കന്‍ഡറി, കോളേജ് വിഭാഗങ്ങളിലാണ് മത്സരം നടന്നത്.
സ്‌കൂള്‍ വിഭാഗത്തില്‍ മേമുണ്ട എച്ച്എസ്എസിലെ ഭഗത് തെക്കേടത്ത്, ആര്‍ യദുനന്ദ് എന്നിവരുടെ ടീം ഒന്നാം സ്ഥാനം നേടി. നന്മണ്ട എച്ച്എസ്എസിലെ ജെപി അദ്വൈത്, മൃണാള്‍ എസ് ജിത്ത് എന്നിവര്‍ രണ്ടാം സ്ഥാനവും മേപ്പയില്‍ ഗവണ്‍മെന്റ് സാന്‍സ്‌ക്രിറ്റ് എച്ച്എസ്എസിലെ ദേവാംഗ് കൃഷ്ണ, ബിഎസ് അജാസ് കൃഷ്ണ എന്നിവര്‍ മൂന്നാം സ്ഥാനവും കരസ്ഥമാക്കി.
കോളജ് വിഭാഗത്തില്‍ മണാശ്ശേരി എംഎഎംഒ കോളജിലെ മുഹമ്മദ് റാഷിദ്, കെ മുഹമ്മദ് ഷാനിദ് എന്നിവരുടെ ടീം ഒന്നാം 
സ്ഥാനവും സെന്റ് ജോസഫ് ദേവഗിരി കോളജിലെ വിപി നിതിന്‍ രാജ്, ശ്രീധര്‍ ജി ലാല്‍ ടീം രണ്ടാം സ്ഥാനവും മലപ്പുറം അലിഗഡ് മുസ്ലിം യൂണിവേഴ്‌സിറ്റി സെന്ററിലെ മുഹമ്മദ് മുസ്തഫ, സി അനീസ് ഫയാസ് ടീം മൂന്നാം സ്ഥാനവും നേടി.
മേഖലാതലത്തില്‍ വിജയിച്ച ടീമുകള്‍ സെമിഫൈനലില്‍ മത്സരിക്കാനുള്ള അര്‍ഹതയാണ് നേടിയത്. സ്‌കൂള്‍ തലത്തില്‍ 39 ടീമും കോളജ് തലത്തില്‍ 11 ടീമുമാണ് മേഖലാ ക്വിസ് മത്സരത്തില്‍ പങ്കെടുത്തത്. നിയമസഭാ സെക്രട്ടറിയേറ്റ് അണ്ടര്‍ സെക്രട്ടറി സി സുരേഷന്‍ ക്വിസ് നയിച്ചു. ഡെപ്യൂട്ടി സെക്രട്ടറി ടി ഒ റെജി സന്നിഹിതയായി.
