കോഴിക്കോട്: മിനിമം വേതനം ഉടന്‍ പുതുക്കി നിശ്ചയിക്കണം എന്ന് ആവശ്യപ്പെട്ട് കേരള പ്രൈവറ്റ് ഫാര്‍മസിസ്റ്റ്‌സ് 
അസോസിയേഷന്‍ (കെപിപിഎ) നേതൃത്വത്തില്‍ സ്വകാര്യ മെഡിക്കല്‍ ഷോപ്പുകളിലെ ഫാര്‍മസിസ്റ്റുമാര്‍ ആഗസ്ത് 19 മുതല്‍ 25 വരെ സെക്രട്ടറിയേറ്റിന്ന് മുന്നില്‍ സപ്തദിന യാചനാ സമരം നടത്തും. ഏഴ് വര്‍ഷത്തോളമായി മിനിമം വേതനം പുതുക്കി നിശ്ചയിക്കാത്ത സാഹചര്യത്തിലാണ് ഇത്തരമൊരു സമരം.
തൊഴില്‍ വകുപ്പ് 2023 ഏപ്രില്‍ 29ന് മിനിമം വേതനം പുതുക്കാനുള്ള കരട് വിജ്ഞാപനം പുറപ്പെടുവിച്ചെങ്കിലും അന്തിമ വിജ്ഞാപനം ഇതുവരെ ഉണ്ടായിട്ടില്ല. ഇതിന്നിടയില്‍ നിരവധി സമരപരിപാടികള്‍ അസോസിയേഷന്‍ സംസ്ഥാനത്ത് നടത്തിയിരുന്നു.
മുന്‍പ് പ്രഖ്യാപിച്ച എല്ലാ മിനിമം വേതനത്തിലും ‘മാനേജര്‍’ എന്ന തസ്തിക ഉണ്ടായിരുന്നു. എന്നാല്‍ ഇത്തവണ പ്രഖ്യാപിച്ച കരട് 
വിജ്ഞാപനത്തില്‍ മാനേജര്‍ പോസ്റ്റ് ഉള്‍പ്പെട്ടില്ല എന്ന വാദമാണ് അന്തിമ വിജ്ഞാപനം വൈകുന്നതിന് കാരണമായി തൊഴില്‍ വകുപ്പ് പറയുന്നത്. വളരെ പെട്ടെന്ന് തന്നെ ഈ സങ്കേതികത്വം പരിഹരിച്ച് കഴിഞ്ഞവര്‍ഷം തന്നെ നടപ്പില്‍ വരേണ്ടിയിരുന്ന മിനിമം വേതനം, 16 മാസം കഴിഞ്ഞിട്ടും നടപ്പാക്കാത്തതില്‍ പ്രതിഷേധിച്ചാണ് വേറിട്ട സമരരീതി സംഘടിപ്പിക്കേണ്ടിവന്നതെന്ന് കെപിപിഎ സംസ്ഥാന പ്രസിഡന്റ് ഗലീലിയോ ജോര്‍ജും ജനറല്‍ സെക്രട്ടറി പി.പ്രവീണും അറിയിച്ചു. ഈ മിനിമം വേതനം നടപ്പാക്കുന്നതിലൂടെ യാതൊരു രീതിലുള്ള ബാധ്യതയും സര്‍ക്കാരിന് വരുന്നില്ല. എന്നിട്ടും ഈ കാലതാമസം ഉണ്ടാകുന്നത് എന്തുകൊണ്ടെന്ന് വ്യക്തമാകുന്നില്ല. 19 ന് ആരംഭിക്കുന്ന സമരം മുന്‍ എംപി പന്ന്യന്‍ രവീന്ദ്രന്‍ ഉദ്ഘാടനം ചെയ്യും. വിവിധ 
രാഷ്ട്രീയ നേതാക്കളും ട്രേഡ് യൂണിയന്‍ ഭാരവാഹികളും സമരത്തെ അഭിസംബോധന ചെയ്യും.