വടകര: ചോറോട് മുട്ടുങ്ങല്‍ മീത്തലങ്ങാടി ബീച്ചില്‍ ബൈക്കുകള്‍ കൂട്ടിയിടിച്ചുണ്ടായ അപകടത്തില്‍ യുവാവ് മരിച്ചു. മീത്തലങ്ങാടിയില്‍ മുട്ടുങ്ങല്‍ ഗവ.എല്‍പി സ്‌കൂളിനു സമീപം കരകെട്ടീന്റവിട അല്‍ത്താഫ് (23) ആണ് മരിച്ചത്. സുഹൃത്ത് സാബിത്തിന് പരിക്കേറ്റു. ഞായറാഴ്ച സന്ധ്യയോടെ കക്കാട്ട് പള്ളിക്കു സമീപമാണ് അപകടം. വേലിയിറക്ക സമയത്ത് കടല്‍ ഉള്‍വലിയുന്നതോടെ ഉണ്ടാകുന്ന വീതിയേറിയ ബീച്ചില്‍ ബൈക്കുകള്‍ ഓടിക്കുന്നതിനിടയില്‍ കൂട്ടിയിടിക്കുകയായിരുന്നു. പരിക്കേറ്റ ഇരുവരേയും ഉടന്‍
വടകരയിലെ ആശുപത്രിയില്‍ എത്തിച്ചെങ്കിലും അല്‍ത്താഫിനെ രക്ഷിക്കാനായില്ല.
കരകെട്ടീന്റവിട അബ്ദുള്‍ കരീമിന്റെയും മൈമൂനത്തിന്റെയും മകനാണ് അല്‍ത്താഫ്. കരീമും മകനും ഒരു മാസം മുമ്പ് ഗള്‍ഫില്‍ നിന്ന് എത്തിയതാണ്. വടകര പോലീസ് ഇന്‍ക്വസ്റ്റ് ചെയ്ത മൃതദേഹം ജില്ലാ ആശുപത്രി മോര്‍ച്ചറിയില്‍ പോസ്റ്റ്‌മോര്‍ട്ടത്തിനു ശേഷം ബന്ധുക്കള്‍ക്ക് വിട്ടുകൊടുക്കും.
