പേരാമ്പ്ര: മാഹിയില്‍ നിന്ന് കടത്തിയ 22 ലിറ്റര്‍ വിദേശമദ്യവുമായി യുവാവ് പോലീസ് പിടിയില്‍. പാലേരി വലിയപറമ്പില്‍ മീത്തല്‍ അജുവിനെയാണ് പേരാമ്പ്ര പോലീസ് അറസ്റ്റ് ചെയ്തത്. രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയില്‍ ഓട്ടോറിഷയിലെ സ്പീക്കര്‍ കാബിനില്‍ ഒളിപ്പിച്ച നിലയിലാണ് മദ്യം കണ്ടെത്തിയത്.
പേരാമ്പ്ര ഡിവൈഎസ്പി വി.വി.ലതീഷിന് ലഭിച്ച രഹസ്യവിവരത്തെ തുടര്‍ന്ന് ഡിവൈഎസ്പി
സ്‌ക്വാഡും പേരാമ്പ്ര എസ്‌ഐ ഷമീറിന്റെ നേതൃത്വത്തിലുള്ള പോലീസും ചേര്‍ന്നാണ് പ്രതിയെ പിടികൂടിയത്. പ്രതി പതിവായി മാഹിയില്‍ നിന്നു മദ്യം പാലേരിയില്‍ എത്തിച്ച് വില്‍ക്കുന്നതായി പോലീസ് പറഞ്ഞു. വ്യാപക പരാതിക്ക് പിന്നാലെ ഇയാളെ പോലീസ്
നിരീക്ഷിച്ചുവരികയായിരുന്നു. പ്രതിയെ കോടതിയില്‍ ഹാജരാക്കുമെന്നു പോലീസ് അറിയിച്ചു.
