മൂരാട് വാഹനാപകടം: ഒരാള്‍ കൂടി മരിച്ചു

വടകര: മൂരാട് പാലത്തിന് സമീപം കഴിഞ്ഞ ഞായറാഴ്ചയുണ്ടായ വാഹനാപകടത്തില്‍ ഗുരുതരമായി പരിക്കേറ്റ് കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലായിരുന്ന ചോറോട് ചേന്ദമംഗലം സ്വദേശി കൊളക്കോട്ട് കണ്ടി സത്യനാഥന്‍ (റിട്ട. ഇന്ത്യന്‍ ബേങ്ക്-66) മരിച്ചു. ഇതോടെ അപകടത്തില്‍ മരിച്ചവരുടെ എണ്ണം അഞ്ചായി.
ഞായറാഴ്ചത്തെ അപകടത്തില്‍ അഴിയൂര്‍, മാഹി സ്വദേശികളായ മൂന്നു സ്ത്രീകളും ഒരു പുരുഷനും സംഭവദിവസം മരണപ്പെട്ടിരുന്നു. വൈകിട്ട് 3.15 ഓടെയാണ് വിവാഹ സല്‍ക്കാരത്തില്‍ പങ്കെടുക്കുന്നതിന് മാഹിയില്‍ നിന്നു കോഴിക്കോട് കോവൂരിലെ വരന്റെ വീട്ടിലേക്ക് പോകുന്നവര്‍ സഞ്ചരിച്ച കാര്‍ എതിരെ വന്ന ട്രാവലര്‍ വാനിലിടിച്ചത്. ഒളവിലം സ്വദേശി പറമ്പത്ത് നളിനി (62), അഴിയൂര്‍ പാറേമ്മല്‍ രജനി (രഞ്ജിനി-50), അഴിയൂര്‍ കോട്ടാമല കുന്നുമ്മല്‍ ഷിഖിന്‍ ലാല്‍ (35), പുന്നോല്‍ കണ്ണാട്ടില്‍ മീത്തല്‍ റോജ (56) എന്നിവരാണ് സംഭവദിവസം മരിച്ചത്. ഗുരുതരമായി പരിക്കേറ്റ സത്യനാഥന്‍ ചികിത്സയിലായിരിക്കെ ഞായറാഴ്ച രാവിലെയാണ് മരണപ്പെട്ടത്. ബന്ധുക്കളോടൊപ്പം യാത്ര ചെയ്യുമ്പോഴാണ് സത്യനും അപകടത്തില്‍പെട്ടത്. ചോറോട്ടെ പരേതരായ കണ്ണന്റെയും കല്യാണിയുടെയും മകനാണ് സത്യനാഥന്‍. ഭാര്യ: സുനീതി. മക്കള്‍: സരുണ്‍നാഥ്, സനീഷ, ശ്രുതി. മരുമക്കള്‍: അഖില, അജയ് കുമാര്‍ (ഏറാമല). സഹോദരങ്ങള്‍: രതീശന്‍, സുശീല.