നാദാപുരം: വിവാഹ പാര്‍ട്ടിക്കാരുടെ വാഹനങ്ങള്‍ തമ്മില്‍ തട്ടിയതിന്റെ പേരിലുണ്ടായ സംഘര്‍ഷവുമായി ബന്ധപ്പെട്ട്‌
10 പേര്‍ക്കെതിരെ വളയം പോലീസ് കേസ് എടുത്തു. ചെക്യാട് സ്വദേശി നിധിന്‍ലാലിന്റെ ഭാര്യ ആതിരയുടെ പരാതിയിലാണ് കേസെടുത്തത്.
ഞായറാഴ്ച ജാതിയേരിയിലുണ്ടായ സംഭവത്തില്‍ ഏഴു മാസം പ്രായമുള്ള കുഞ്ഞടക്കം നാലു പേര്‍ക്ക് പരിക്കേറ്റിരുന്നു. വിവാഹത്തിന് പോവുകയായിരുന്ന കുടുംബം സഞ്ചരിച്ച കാറും മറ്റൊരു വിവാഹ പാര്‍ട്ടിക്കാര്‍ സഞ്ചരിച്ച ജീപ്പും തമ്മിലാണ് തട്ടിയത്. കാറില്‍ ജീപ്പ് തട്ടിയത് ചോദ്യം ചെയ്തപ്പോള്‍ ജീപ്പില്‍ നിന്നു പുറത്തിറങ്ങിയവര്‍ ആക്രമിച്ചു എന്നാണ് പരാതി. ആളുകള്‍ക്ക് പരിക്കേറ്റതിനു പുറമെ കാറിന്റെ ഗ്ലാസ് തകര്‍ക്കുകയും ചെയ്തു.
