മണിയൂര്‍: കുറുന്തോടി തുഞ്ചന്‍ സ്മാരക ലൈബ്രറി വനിതാവേദി കോഴിക്കോട് നെഹ്രു യുവകേന്ദ്രയുടെ
സഹകരണത്തോടെ സംഘടിപ്പിച്ച അന്താരാഷ്ട്ര വനിതാ ദിനാഘോഷം സ്ത്രീ ശാക്തീകരണത്തിന്റെ പുത്തന്‍ ഗാഥയായി. പ്രഭാഷണം, ആദരിക്കല്‍, കലാവിരുന്ന് എന്നിങ്ങനെ വൈവിധ്യമാര്‍ന്ന പരിപാടികള്‍ അരങ്ങേറി.സംസ്ഥാന ചലച്ചിത്ര അക്കാദമി റീജിയണല്‍ കോ-ഓര്‍ഡിനേറ്റര്‍ നവീന വിജയന്‍ ഉദ്ഘാടനം ചെയ്തു. വനിതാ വേദി ചെയര്‍പേഴ്‌സന്‍ പി.ടി.ഗീത അധ്യക്ഷത വഹിച്ചു. സാമൂഹിക സുരക്ഷയും സ്ത്രീ സമൂഹവും എന്ന വിഷയത്തില്‍ ക്ലിനിക്കല്‍ സൈക്കോളജിസ്റ്റ് ഡോ.ടി.പി.ഭാര്‍ഗവന്‍ പ്രഭാഷണം നടത്തി. പരിപാടിയുടെ ഭാഗമായി ഭിന്നശേഷി
കുട്ടികളുടെ അമ്മമാരെ കെ.ഹസിത, ഒ.എം.ഗീത, ശാലിനി അജയന്‍ എന്നിവര്‍ ആദരിച്ചു. മണിയൂര്‍ ഗ്രാമപഞ്ചായത്ത് മെമ്പര്‍ പി.കെ.ബിന്ദു, ഐ.ഓമന എന്നിവര്‍ പ്രസംഗിച്ചു. വനിതവേദി കണ്‍വീനര്‍ സി.വി.ലിഷ സ്വാഗതവും വൈസ് ചെയര്‍പേഴ്‌സന്‍ ബീന അജിതാലയം നന്ദിയും പറഞ്ഞു.നൃത്തവും പാട്ടും കവിതയും വടക്കന്‍പാട്ടും ഉള്‍പെടെയുള്ള വനിതകളുടെ കലാപരിപാടികള്‍ കൈയടി നേടി. സ്ത്രീകളുടെ പങ്കാളിത്തം കൊണ്ടും സംഘാടനം കൊണ്ടും ഉള്ളടക്കം കൊണ്ടും ശ്രദ്ധേയമായി മാറി വനിതാ ദിനാചരണം.
