കണ്ണൂര്‍-ഷൊര്‍ണൂര്‍ എക്‌സ്പ്രസ് സര്‍വീസ് ജൂണ്‍ വരെ നീട്ടി

കണ്ണൂര്‍: വടക്കേ മലബാറിലെ യാത്രാ ദുരിതം പരിഹരിക്കാന്‍ അനുവദിച്ച കണ്ണൂര്‍ ഷൊര്‍ണൂര്‍ (06031/32) എക്‌സ്പ്രസ് സ്‌പെഷ്യല്‍ ട്രെയിന്‍ സര്‍വീസ് 2025 ജൂണ്‍ വരെ നീട്ടി.
പ്രതിദിന സര്‍വീസ് ആയാണ് യാത്ര തുടരുക. ആഴ്ചയില്‍ നാല് ദിവസം സര്‍വീസ് എന്ന നിലയില്‍ കഴിഞ്ഞ ജൂലൈയില്‍ ഒരു മാസത്തേക്ക് അനുവദിച്ച ട്രെയിന്‍ യാത്രക്കാരുടെ തിരക്ക് പരിഗണിച്ച് തുടരുകയാണ്.
നവംബര്‍ ഒന്ന് മുതലാണ് ട്രെയിന്‍ പ്രതിദിനമാക്കിയത്. സ്‌പെഷ്യല്‍ ട്രെയിന്‍ സര്‍വീസ് ആയതിനാല്‍ എക്‌സ്പ്രസ് നിരക്ക് ഈടാക്കുന്നത് തുടരും.
രാവിലെ 8.10ന് കണ്ണൂരില്‍ നിന്ന് പുറപ്പെടുന്ന ട്രെയിന്‍ 8.25ന് തലശ്ശേരിയിലും 8.36ന് മാഹിയിലും 9.45ന് കോഴിക്കോടും 11.45ന് ഷൊര്‍ണൂരുമെത്തും. തിരികെ വൈകിട്ട് മൂന്നിന് പുറപ്പെടുന്ന ട്രെയിന്‍ 5.25ന് കോഴിക്കോടും തുടര്‍ന്ന് 6.41ന് തലശ്ശേരിയിലും രാത്രി 7.25ന് കണ്ണൂരിലും എത്തും.