സിപിഎം ജില്ലാ സമ്മേളനം: മൂന്നു ദിവസവും മുഖ്യമന്ത്രി വടകരയില്‍

വടകര: ജനുവരി 29,30,31 തിയതികളില്‍ വടകരയില്‍ നടക്കുന്ന സിപിഎം ജില്ലാ സമ്മേളന പ്രതിനിധി സമ്മേളനവും പൊതുസമ്മേളനവും പിബി അംഗവും മുഖ്യമന്ത്രിയുമായ പിണറായി വിജയന്‍ ഉദ്ഘാടനം ചെയ്യും. പ്രതിനിധി സമ്മേളനം ടൗണ്‍ഹാളിലെ കോടിയേരി ബാലകൃഷ്ണന്‍ നഗറിലും, പൊതുസമ്മേളനം നാരായണനഗറിലെ സീതാറാം യെച്ചൂരി നഗറിലുമാണ് നടക്കുക. വിവിധ ഏരിയ സമ്മേളങ്ങളില്‍ നിന്നു തെരഞ്ഞെടുക്കപ്പെട്ട 500 പ്രതിനിധികളാണ് മൂന്ന് ദിവസങ്ങളിലായി നടക്കുന്ന പ്രതിനിധി സമ്മേളനത്തില്‍ പങ്കെടുക്കുക. പ്രതിനിധി സമ്മേളനം ജനുവരി 29 ന് രാവിലെ 9ന് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ജനുവരി 31ന് 15,000 റെഡ് വളണ്ടിയര്‍മാരുടെ മാര്‍ച്ചും അരലക്ഷം പേര്‍ പങ്കെടുക്കുന്ന ബഹുജനറാലിയും നാരായണനഗറില്‍ നടക്കും. ബഹുജന റാലി പിണറായി വിജയന്‍ ഉദ്ഘാടനം ചെയ്യും. മൂന്ന് ദിവസങ്ങളിലായി നടക്കുന്ന പ്രതിനിധി സമ്മേളനത്തില്‍ മുഖ്യമന്ത്രിയെ കൂടാതെ പിബി അംഗമായ എ.വിജയരാഘവന്‍, കേന്ദ്ര കമ്മിറ്റി അംഗങ്ങളായ ഇ.പി.ജയരാജന്‍, പി.കെ.ശ്രീമതി, എളമരം കരീം, പി.സതീദേവി, സംസ്ഥാന സെക്രട്ടറിയറ്റ് അംഗങ്ങളായ ടി.പി.രാമകൃഷ്ണന്‍, പി.എ.മുഹമ്മദ് റിയാസ്, ആനാവൂര്‍ നാഗപ്പന്‍, പി.കെ.ബിജു, പുത്തലത്ത് ദിനേശന്‍ എന്നിവരും പങ്കെടുക്കും.