കക്കട്ടില്‍: ശരീരത്തില്‍ കമ്പി കൂടുങ്ങിയ തെരുവുനായ വേദനയാല്‍ പുളയുന്നത് സങ്കടക്കാഴ്ചയാവുന്നു. രക്ഷിച്ച് കിട്ടാന്‍ തലങ്ങും വിലങ്ങും ഓടുകയാണ് നായ. കാലുകള്‍ക്കും വയറിനും ഇടയിലാണ് കമ്പി കുടുങ്ങിയിരിക്കുന്നത്. കക്കട്ടില്‍ അജന്ത തിയേറ്ററിന് സമീപം കുറച്ച് ദിവസമായി നായ ഈ അവസ്ഥയിലാണ്. കമ്പി ഊരിയെടുത്ത് നായയെ രക്ഷിക്കാന്‍ നാട്ടുകാര്‍ ശ്രമിച്ചെങ്കിലും 
വിജയിച്ചില്ല. നായയെ പിടിക്കുന്നവരോ മൃഗസംരക്ഷണ വകുപ്പില്‍ നിന്ന് ആരെങ്കിലുമോ എത്തി രക്ഷിക്കണമെന്നാണ് മൃഗസ്‌നേഹികളുടെയും പരിസരവാസികളുടെയും അഭ്യര്‍ഥന.
