വടകര: പുതിയ സ്റ്റാന്റിനു സമീപത്തെ കടയില്‍ വെച്ചുമറന്ന പേഴ്‌സുമായി ഒരാള്‍ കടന്നുകളഞ്ഞതായി പരാതി. പുതുപ്പണം 
പാലോളിപ്പാലം ധനുവോത്ത് ബിജേഷിന്റെ പണവും വിലപിടിപ്പുള്ള രേഖകളും അടങ്ങിയ പേഴ്‌സാണ് കഴിഞ്ഞ ദിവസം നഷ്ടപ്പെട്ടത്.
എസ്ആര്‍ ജനറല്‍ സ്‌റ്റോറില്‍ സാധനം വാങ്ങാനെത്തിയ ബിജേഷ് പണം കൊടുത്ത ശേഷം പേഴ്‌സ് കടയിലെ മേശപ്പുറത്ത് വെച്ചു മറന്നുപോവുകയായിരുന്നു. അല്‍പസമയത്തിനു ശേഷം പേഴ്‌സ് ശ്രദ്ധയില്‍പെട്ട കടക്കാരന്‍ കടയില്‍ നിന്ന് ഇറങ്ങിപ്പോവുന്ന മറ്റൊരാളോട് പേഴ്‌സിന്റെ കാര്യം ചൂണ്ടിക്കാണിച്ചപ്പോള്‍ അയാള്‍ പേഴ്‌സുമായി സ്ഥലം വിടുകയാണുണ്ടായത്. യഥാര്‍ഥ ഉടമയായ ബിജേഷ് പത്ത് മിനുട്ടിനുള്ളില്‍ തിരികെ എത്തിയപ്പോഴാണ് പേഴ്‌സ് മറ്റൊരാള്‍ എടുത്തുകൊണ്ടുപോയ കാര്യം അറിയുന്നത്. സിസിടിവി പരിശോധിച്ചപ്പോള്‍ ആളെ വ്യക്തമാണ്. ഒരു ദിവസമായിട്ടും പേഴ്‌സ് തിരികെ കിട്ടാതെ വന്നതോടെ ബിജേഷ് വടകര പോലീസില്‍ പരാതി നല്‍കി. കാക്കി ഷര്‍ട്ട് ധരിച്ച മധ്യവയസ്‌കനാണ് പേഴ്‌സുമായി കടയില്‍ നിന്ന് ഇറങ്ങിപ്പോയത്. 
സിസിടിവിയിലെ ദൃശ്യം വാട്‌സാപ്പ് ഗ്രൂപ്പുകളില്‍ ഷെയര്‍ ചെയ്തിട്ടുണ്ടെങ്കിലും നഷ്ടപ്പെട്ട പേഴ്‌സ് ഇതുവരെ കിട്ടിയില്ല. ഇക്കാര്യത്തില്‍ വല്ല വിവരവും ലഭിക്കുന്നവര്‍ 8086893534 എന്ന നമ്പറില്‍ ബന്ധപ്പെടണമെന്ന് ബിജേഷ് അറിയിച്ചു.
