വളയം: ഓട്ടോയില്‍ നിന്ന് കളഞ്ഞ് കിട്ടിയ പണമടങ്ങിയ പേഴ്‌സ് ഉടമസ്ഥന് തിരികെ നല്‍കി യുവാവ്. വളയം വണ്ണാര്‍ കണ്ടി എലിക്കുന്നുമ്മല്‍ അഷിന്‍ലാല്‍ (28) ആണ് പേഴ്‌സ് ഉടമസ്ഥന് തിരികെ നല്‍കി സത്യസന്ധതയുടെ വഴിയില്‍ തിളങ്ങിയത്. ഇത് രണ്ടാം തവണയാണ് ആഷില്‍ ലാല്‍ സത്യസന്ധത തെളിയിക്കുന്നത്.ഇക്കഴിഞ്ഞ ശനിയാഴ്ച തുണേരിയില്‍ നിന്ന്
അഷിന്‍ലാലിന്റെ ഓട്ടോയില്‍ ഇതര സംസ്ഥാന തൊഴിലാളി കയറിയിരുന്നു. ഇയാളെ പാറക്കടവില്‍ ഇറക്കിയ ശേഷം വീട്ടിലേക്ക് പോകുംവഴിയാണ് ഓട്ടോയില്‍ പേഴ്‌സ് വീണുകിടക്കുന്നത് കണ്ടത്. ആറായിരം രൂപ പേഴ്‌സിലുണ്ടായിരുന്നു. തുടര്‍ന്ന് അഷിന്‍ ലാല്‍ പേഴ്‌സ് വളയം പോലീസില്‍ ഏല്‍പ്പിക്കുകയായിരുന്നു. രാത്രിയോടെ പേഴ്‌സ് നഷ്ടപ്പെട്ട അതിഥി തൊഴിലാളി വളയം സ്റ്റേഷനിലെത്തി. അഷിന്‍ ലാല്‍ പോലീസിന്റെ
സാന്നിധ്യത്തില്‍ പേഴ്‌സ് കൈമാറുകയുമായിരുന്നു. അഷിന്‍ലാലിന്റെ സത്യസന്ധതയെ നാട്ടുകാര്‍ അഭിനന്ദിച്ചു. നാല് വര്‍ഷം മുമ്പ് വളയം ടൗണില്‍ നിന്ന് കളഞ്ഞുകിട്ടിയ സ്വര്‍ണാഭരണം ഉടമസ്ഥനെ കണ്ടെത്തി തിരികെ നല്‍കി നാട്ടുകാരുടെ പ്രശംസ ഏറ്റുവാങ്ങിയ ആളാണ് അഷിന്‍ലാല്‍.
