നാദാപുരം: ചെക്യാട് കുറുവന്തേരിയിൽ ഇന്നോവ കാറിന് തീ വെച്ചു. കുറുവ
ന്തേരിയിലെ പൂക്കോട്ടുമ്മൽ അസീസിൻ്റെ കാറിന് നേരെയാണ് തീ വെപ്പ് ഉണ്ടായത്. തിങ്കളാഴ്ച്ച പുലർച്ചെ രണ്ട് മണിയോടെയാണ് സഭവം. വീടിൻ്റെ മുറ്റത്ത് നിന്ന് വെളിച്ചംകണ്ടതിനെ തുടർന്നാണ് കാറിൽ തീ പടരുന്നത് ശ്രദ്ധയിൽ പെടുന്നത്. തുടർന്ന് വീട്ടുകാർ തീ കെടുത്തുകയായിരുന്നു. കാറിൻ്റെ ഇടത് ഭാഗത്ത് ഡോറിലാണ് കത്തിയത്. ഡീസൽ ടാങ്കിൻ്റെ
ഡോർ കുത്തി തുറന്ന നിലയിലാണ്. കാറിന് ഉള്ളിലേക്ക് തീ പടരാതിരുന്നതിനാൽ വൻ അപകടം ഒഴിവായി. സമീപത്ത് നിർത്തിയിട്ട മോട്ടോർ ബൈക്ക് ഉൾപ്പെടെയുള്ളവ ഉടൻ നീക്കുകയും ചെയ്തു. സംഭവം അറിഞ്ഞ് രാത്രിയോടെ തന്നെ വളയം പോലീസ് സ്ഥലത്ത്
എത്തി പരിശോധന നടത്തി. സംഭവത്തിൽ വളയം പോലീസിൽ പരാതി നൽകി. പോലീസ് കേസെടുത്ത് അന്വേഷണം ആരംഭിച്ചു. നാദാപുരം ഡിവൈഎസ്പി എ.പി.ചന്ദ്രൻ, വളയം സിഐ ഇ.വി.ഫായിസ് അലി, വടകര നിന്ന് വിരലടയാള വിദഗ്ധരും ഫോറൻസിക് വിദഗ്ധരും സ്ഥലത്തെത്തി പരിശോധന നടത്തി.
