ബ്യൂണസ് അയേഴ്‌സ്‌: ലോകകപ്പ് ഫുട്ബോളിന്റെ യോഗ്യത മത്സരത്തിൽ ബൊളീവിയയെ ആറു ഗോളിന് അർജന്റീന 
മുക്കിയപ്പോൾ മൂന്നും ലയണൽ മെസ്സി എന്ന താരരാജാവിന്റെ ബൂട്ടിൽനിന്ന്. ബൊളീവിയയുടെ പോസ്റ്റിൽ പതിച്ച് മറ്റു മൂന്നു ഗോളുകളിൽ രണ്ടെണ്ണം പിറന്നതും മെസ്സിയുടെ അസിസ്റ്റിൽ. അർജന്റീനയുടെ ഫുട്ബോൾ ആരാധകർക്ക് ഒരിക്കൽ കൂടി മെസ്സി കളിമികവിന്റെ വിരുന്നേകി.
334 ദിവസത്തിന് ശേഷം, അർജൻ്റീനയിൽ മെസ്സിയുടെ ആദ്യ മത്സരമായിരുന്നു ബൊളീവിയക്കെതിരെയുള്ളത്. ബ്യൂണസ് ഐറിസിലെ എസ്റ്റാഡിയോ മാസ് സ്മാരക സ്റ്റേഡിയത്തിൽ ഇരച്ചെത്തിയ ആരാധകരെ ലോകകപ്പ് ചാമ്പ്യൻ നിരാശപ്പെടുത്തിയില്ല. ഇടതും വലതും കാലുകളിൽനിന്ന് ഗോൾ നേടി ആരാധകരെ മെസി ആവേശത്തിലാറാടിച്ചു. ഈ മാസാവസാനം ഇൻ്റർ മിയാമിയുമായുള്ള എം.എൽ.എസ് കപ്പ് പ്ലേഓഫ് മത്സരത്തിലേക്കുള്ള വരവ് അറിയിക്കുന്നത് കൂടിയായിരുന്നു മെസ്സിയുടെ പ്രകടനം. തിയാഗോ അൽമാഡ, ജൂലിയൻ അൽവാരസ്, ലൗത്താരോ മാർട്ടിനെസ് എന്നിവരാണ് അർജന്റീനക്ക് വേണ്ടി മറ്റു ഗോളുകൾ നേടിയത്.
19-ാം മിനിറ്റിൽ മെസ്സിയിലൂടെയാണ് അർജന്റീന ഗോൾവേട്ടക്ക് തുടക്കമിട്ടത്. 84-ാം മിനിറ്റിലും 86-ാം മിനിറ്റിലുമായിരുന്നു മറ്റു രണ്ടു ഗോളുകൾ. 2023 മാർച്ച് 28 ന് കുറക്കാവോയ്‌ക്കെതിരെയാണ് മെസ്സിയുടെ അവസാന ഹാട്രിക് പിറന്നത്. ആ മത്സരത്തിൽ 
ഏകപക്ഷീയമായ ഏഴു ഗോളുകൾക്കായിരുന്നു അർജന്റീനയുടെ ജയം.
