കോഴിക്കോട്: അത്തോളിയില്‍ സ്വകാര്യ ബസുകള്‍ കൂട്ടിയിടിച്ച് നാല്‍പതോളം പേര്‍ക്ക് പരിക്ക്. നാലുപേരുടെ നില ഗുരുതരമാണ്. 
കോളിയോട് താഴത്ത് വെച്ച് ബസുകള്‍ നേര്‍ക്ക് നേര്‍ ഇടിക്കുകയായിരുന്നു. കുറ്റ്യാടി ഭാഗത്ത് നിന്നു കോഴിക്കോട്ടേക്ക് വരുന്ന ബസും കോഴിക്കോട് ഭാഗത്ത് നിന്ന് അത്തോളിയിലേയ്ക്ക് പോകുന്ന ബസുമാണ് കൂട്ടിയിടിച്ചത്. പരിക്കേറ്റവരെ കോഴിക്കോട്ടെ വിവിധ ആശുപത്രികളിലേക്ക് മാറ്റി. 37 പേരാണ് ആശുപത്രികളില്‍ ചികിത്സയില്‍ ഉള്ളത്.
അമിത വേഗതയാണ് അപകടത്തിന് കാരണമെന്നാണ് പ്രാഥമിക നിഗമനം. എതിര്‍ദിശകളില്‍ നിന്നു വന്ന ഇരു ബസുകളുടെയും മുന്‍ഭാഗം അപകടത്തില്‍ തകര്‍ന്നു. രണ്ടു ബസുകളിലേയും ഡ്രൈവര്‍മാര്‍ക്ക് പരിക്കേറ്റിട്ടുണ്ട്. പോലീസും നാട്ടുകാരും രക്ഷാപ്രവര്‍ത്തനം നടത്തി. ഇവിടെ വാഹനങ്ങള്‍ക്ക് വേഗത കൂടുതലാണെന്ന് നാട്ടുകാര്‍ പരാതിപ്പെട്ടു.
