വടകര: കോട്ടപ്പള്ളി റൂട്ടില്‍ മേമുണ്ടക്ക് സമീപത്തെ വളവില്‍ അപകടം പതിയിരിക്കുന്നു. ചെമ്മരത്തൂര്‍ ഭാഗത്ത് പല്ലവി ബസ് 
സ്റ്റോപ്പിനും മേമുണ്ട സ്‌കൂളിനും ഇടയിലാണ് അപകട വളവ്. പലപ്പോഴായി ചെറുതും വലുതുമായ അപകടം നടക്കുന്നു. ഇന്ന് രാവിലെയും ഉണ്ടായി അപകടം. കുതിച്ചെത്തിയ കാര്‍ ഇലക്ട്രിക് പോസ്റ്റില്‍ ഇടിച്ചു. ഭാഗ്യത്തിന് ആളപായമില്ല.
വളവ് ഗൗനിക്കാതെ വാഹനങ്ങള്‍ കുതിക്കുമ്പോഴാണ് അപകടത്തിനിടയാക്കുന്നതെന്ന് നാട്ടുകാര്‍ പറഞ്ഞു. മേമുണ്ട സ്‌കൂളിലെ കുട്ടികളൊക്കെ നടന്നുപോകുന്ന വഴി കൂടിയാണിത്. വാഹനങ്ങളുടെ അതിവേഗത നാട്ടുകാരെ ഭയപ്പെടുത്തുകയാണ്. അപകടം ആവര്‍ത്തിക്കാതിരിക്കാന്‍ സ്ഥലത്ത് ഡിവൈഡര്‍ സ്ഥാപിക്കണമെന്ന ആവശ്യം ഉയര്‍ന്നു. ഇക്കാര്യം ഉന്നയിച്ച് ഡിവൈഎഫ്‌ഐ 
യൂനിറ്റ് കമ്മിറ്റി വടകര ആര്‍ടിഒവിന് നിവേദനം നല്‍കി.
