കുറ്റ്യാടി: മുപ്പതാം തീയതി നടത്താന്‍ തീരുമാനിച്ച കുറ്റ്യാടി ബൈപ്പാസ് നിര്‍മാണ പ്രവൃത്തി ഉദ്ഘാടനം ബഹിഷ്‌കരിക്കാന്‍ 
യുഡിഎഫ് കുറ്റ്യാടി പഞ്ചായത്ത് കമ്മിറ്റി തീരുമാനിച്ചു. ബൈപ്പാസ് നിര്‍മ്മാണത്തിന്റെ സ്ഥലം ഏറ്റെടുക്കല്‍ ഉള്‍പ്പെടെ അതിന്റെ നിയമ തടസ്സങ്ങള്‍ എല്ലാം ഒഴിവാക്കി ടെന്‍ഡര്‍ ചെയ്യുന്നതു വരെയുള്ള പ്രവൃത്തി പൂര്‍ത്തീകരിക്കാന്‍ നേതൃത്വം നല്‍കിയ മുന്‍ എംഎല്‍എ പാറക്കല്‍ അബ്ദുല്ലയെ പരിപാടിയില്‍ പങ്കെടുപ്പിക്കാന്‍ തയ്യാറാകാത്തതാണ് ബഹിഷ്‌കരണ തീരുമാനത്തിനു പിന്നില്‍.
ഏറെ പ്രതിസന്ധികളിലൂടെയാണ് കുറ്റ്യാടി ബൈപ്പാസിന്റെ സ്ഥലമെടുക്കല്‍ ഉള്‍പ്പെടെയുള്ള പ്രവൃത്തി നടന്നത്. ഓരോ ഘട്ടത്തിലും അന്നത്തെ എംഎല്‍എ എന്ന നിലയില്‍ പാറക്കല്‍ അബ്ദുള്ള സമയോചിതമായി ഇടപെടുകയും തടസം നീക്കിയുമാണ് മുന്നോട്ടു പോയത്. യാഥാര്‍ഥ്യമാക്കുന്നതിന് മുമ്പേതന്നെ അദ്ദേഹത്തിന്റെ കാലാവധി കഴിഞ്ഞു. ഇപ്പോള്‍ നടക്കുന്ന പ്രവൃത്തി ഉദ്ഘാടനത്തിന്ന് മുന്‍ എംഎല്‍എ എന്ന നിലയില്‍ പാറക്കല്‍ അബ്ദുല്ലയെ ക്ഷണിക്കണമെന്ന് യുഡിഎഫ് പ്രതിനിധികള്‍ ആവശ്യപ്പെട്ടപ്പോള്‍ അങ്ങനെ ഒരു കീഴ് വഴക്കമില്ല എന്ന മറുപടിയാണ് അധികൃതരുടെ ഭാഗത്തുനിന്ന് ഉണ്ടായത്. കഴിഞ്ഞ 
ലോകസഭ തെരഞ്ഞെടുപ്പിന് മുന്നേ കുറ്റ്യാടി ഗവണ്‍മെന്റ് ആശുപത്രിയുടെ പുതിയ കെട്ടിടത്തിന്റെ ഉദ്ഘാടന വേദിയില്‍ ഇടതുപക്ഷ മുന്നണിയുടെ വടകരയിലെ സ്ഥാനാര്‍ഥിയായിരുന്ന കെ കെ ശൈലജയെ മുന്‍ മന്ത്രി എന്ന നിലയില്‍ പങ്കെടുപ്പിച്ച കീഴ് വഴക്കം ചൂണ്ടിക്കാട്ടിയിട്ടും അതൊന്നും അംഗീകരിക്കാതെ പാറക്കല്‍ അബ്ദുല്ലയെ പങ്കെടുപ്പിക്കില്ല എന്ന നിലപാടില്‍ ഉറച്ചുനില്‍ക്കുകയാണ് അധികാരികള്‍ ചെയ്തത്. ഇതില്‍ പ്രതിഷേധിച്ചാണ് ബൈപ്പാസ് പ്രവൃത്തി ഉദ്ഘാടനം ബഹിഷ്‌കരിക്കാന്‍ യുഡിഎഫ് തീരുമാനിച്ചത്.
യോഗത്തില്‍ യുഡിഎഫ് ചെയര്‍മാന്‍ പി കെ സുരേഷ് അധ്യക്ഷത വഹിച്ചു. വി പി മൊയ്തു, ശ്രീജേഷ് ഊരത്ത്, സി വി മൊയ്തു, കെ പി മജീദ്, മംഗലശ്ശേരി ബാലകൃഷ്ണന്‍, എന്‍ സി കുമാരന്‍, പി പി ആലിക്കുട്ടി, ലത്തീഫ് സി, ഗ്രാമപഞ്ചായത്ത് മെമ്പര്‍മാരായ ഹാഷിം നമ്പാട്ടില്‍, എസി മജീദ്, എം പി കരീം, ടി സുരേഷ് ബാബു, എസ് ജെ സജീവ് കുമാര്‍, മൊയ്തു കരങ്ങോട്ടുമേല്‍, മഹമൂദ് എം എന്നിവര്‍ 
സംസാരിച്ചു.
കുറ്റ്യാടി ബൈപ്പാസ് പ്രവൃത്തി ഉദ്ഘാടനം ബഹിഷ്‌കരിക്കുമെന്ന് യുഡിഎഫ്
