വടകര: ജില്ലാ ക്രൈം ബ്രാഞ്ച് കുറ്റപത്രം സമര്‍പ്പിക്കാത്തതിനെ തുടര്‍ന്ന് ഡിവൈഎസ്പിയുടെ ഔദ്യോഗിക വാഹനം കത്തിച്ച 
കേസില്‍ പ്രതിക്ക് കോടതി ജാമ്യം അനുവദിച്ചു. വടകര ബീച്ച് കബറിന്‍ പുറം സാദാന്റവിട പി.അബ്ദുള്‍ ജലീലിനാണ് (45) വടകര ജുഡീഷ്യല്‍ ഫസ്റ്റ് ക്ലാസ് മജിസ്ട്രേറ്റ് എ.എം.ഷീജ ഉപാധികളോടെ ജാമ്യം അനുവദിച്ചത്. 90 ദിവസം കഴിഞ്ഞിട്ടും അന്വേഷണ ഉദ്യോഗസ്ഥനായ ജില്ലാ ക്രൈം ബ്രാഞ്ച് ഡിവൈഎസ്പി ഈ കേസില്‍ കുറ്റപത്രം സമര്‍പ്പിച്ചിരുന്നില്ല. ജാമ്യാപേക്ഷ കോടതിയില്‍ വന്നപ്പോള്‍ കേസില്‍ അന്വേഷണം പൂര്‍ത്തിയായിട്ടില്ലെന്ന റിപ്പോര്‍ട്ടാണ് കോടതിയില്‍ സമര്‍പ്പിച്ചത്. 10 ലക്ഷം രൂപ കോടതിയില്‍ കെട്ടിവെക്കണമെന്ന നിബന്ധനയിലും ഒരു ലക്ഷം രൂപയുടെ രണ്ടാള്‍ ജാമ്യത്തിലുമാണ് ജാമ്യം അനുവദിച്ചത്. എന്നാല്‍ പണം കെട്ടിവെക്കാനില്ലാത്തതിനാല്‍ പ്രതിക്ക് പുറത്തിറങ്ങാന്‍ കഴിഞ്ഞില്ല.
2024 മാര്‍ച്ച് 10 നാണ് വടകര ഡിവൈഎസ്പി ഓഫീസ് മുറ്റത്ത് നിര്‍ത്തിയിട്ട ഡിവൈഎസ്പിയുടെ ഔദ്യോഗിക വാഹനമായ കെഎല്‍ 01 സിഎച്ച് -3987 ടാറ്റ സുമോ തീ വെച്ച് നശിപ്പിച്ചത്. വാഹനത്തിലുണ്ടായിരുന്ന രണ്ട് ഹെല്‍മറ്റ്, രണ്ട് ബോഡി പ്രൊട്ടക്റ്റര്‍, നാല് ഗ്രനേഡുകള്‍, നാല് ടിയര്‍ ഗ്യാസ് ഷെല്‍, വയര്‍ലെസ് സെറ്റ്, ജി പി എസ്, ആറ് ലാത്തികള്‍ എന്നിവയും കത്തി നശിച്ചിരുന്നു. അന്നത്തെ ജില്ലാ പോലീസ് മേധാവിയുടെ നിര്‍ദേശ പ്രകാരം റൂറല്‍ ജില്ലാ ക്രൈം ബ്രാഞ്ച് ഡിവൈഎസ്പിയായിരുന്ന ഉല്ലാസ് 
കുമാറായിരുന്നു കേസ് അന്വേഷിച്ചത്. പിന്നീട് കേസ് സിസിആര്‍ബി ഡിവൈഎസ്പി സി ഷാജ് ജോസ് ഏറ്റെടുത്തു. 90 ദിവസം കഴിഞ്ഞിട്ടും അന്വേഷണം പൂര്‍ത്തിയാക്കി കുറ്റപത്രം സമര്‍പിച്ചില്ല. തുടര്‍ന്നാണ് ഉപാധികളോടെ ജാമ്യം അനുവദിച്ചത്.
