ആയഞ്ചേരി: ഇടക്കിടെ പെയ്തിറങ്ങുന്ന മഴയില്‍ ഉറവെള്ളം ഉയരുന്നത് കൊണ്ട് കുടിവെള്ള സ്രോതസ്സുകള്‍ മലനീകരിക്കപ്പെടാന്‍ സാധ്യതയുള്ളതിനാല്‍ അവ സുരക്ഷിതമാക്കുക എന്ന ലക്ഷ്യത്തോടെ മംഗലാട് പ്രദേശത്ത് ശുചീകരണ യജ്ഞം. കിണര്‍ വെള്ളം ക്ലോറിനേഷന്‍ ചെയ്യുന്നതിന്റെയും പരിസര ശുചീകരണത്തിന്റെയും ഉദ്ഘാടനം വാര്‍ഡ് മെമ്പര്‍ എ.സുരേന്ദ്രന്‍ നിര്‍വഹിച്ചു. ജലജന്യരോഗങ്ങളെയും ജന്തു ജന്യരോഗങ്ങളെയും അകറ്റി നിര്‍ത്താന്‍ പരിസര ശുചീകരണത്തിലൂടെ കഴിയും. അതിനാല്‍ ചില ശീലങ്ങള്‍ പാലിച്ചാല്‍
മതി. മഞ്ഞപ്പിത്തവും വയറിളക്കവും ഡങ്കി പനിയുമൊക്കെ അങ്ങിങ്ങായി കണ്ടുവന്നത് യഥാസമയം ഇടപെട്ട് സൂപ്പര്‍ ക്ലോറിനേഷനിലൂടെയും മറ്റും ഫലം കണ്ടു. തിളപ്പിച്ചാറിയ വെള്ളം കുടിക്കല്‍ ശീലമാക്കിയും ജ്യൂസുകള്‍ പരമാവധി ഉപേക്ഷിച്ചും ഇത്തരം രോഗങ്ങള്‍ ഒഴിവാക്കാം. പ്ലാസ്റ്റിക്ക് കവറുകള്‍, ചിരട്ട, ഐസ്‌ക്രീം കപ്പുകള്‍, കുപ്പികള്‍, പറമ്പില്‍ വീണു
കിടക്കുന്ന പാളകള്‍, വെള്ളം കെട്ടിക്കിടക്കാന്‍ സാധ്യതയുള്ള പാഴ് വസ്തുക്കള്‍ തുടങ്ങിയവ സ്വയം പരിശോധിച്ച് വീടും പരിസരവും ശുചിത്വമുള്ളതാണെന്ന് ഉറപ്പ് വരുത്തണം. ഇതിന് അല്‍പ സമയം മാറ്റിവെച്ചും ആരോഗ്യ വളണ്ടിയര്‍മാര്‍ ക്ലോറിനേഷന്‍ ചെയ്യാന്‍ എത്തുമ്പോള്‍ സഹകരിച്ചും ഇടപെടാന്‍ മെമ്പര്‍ അഭ്യര്‍ഥിച്ചു. ഭാവിയില്‍ സാമ്പത്തിക ഭദ്രതയ്ക്ക് ഇത് കാരണമാവും. പനയുള്ളതില്‍ അമ്മത് ഹാജി, കുളങ്ങരത്ത് നാരായണക്കുറുപ്പ്, ആശാ വര്‍ക്കര്‍ ടി.കെ.റീന, ദീപ തിയ്യര്‍ കുന്നത്ത്, ഷൈനി വെള്ളോടത്തില്‍, മേഘ പൊട്ടന്റവിട, പ്രജിത പാലോള്ളതില്‍, ഷൈനി കുറ്റിക്കാട്ടില്‍ തുടങ്ങിയവര്‍ സംബന്ധിച്ചു.
