പ്രവാസികളെ പിഴിഞ്ഞ് വിമാനക്കമ്പനികള്‍; യാത്രാനിരക്ക് കൂട്ടിയത് കുത്തനെ

കോഴിക്കോട്: മധ്യവേനല്‍ അവധി കഴിഞ്ഞ് ഗള്‍ഫ് നാടുകളിലേക്ക് മടങ്ങുന്നവരെ പിഴിയാന്‍ കച്ചകെട്ടി വിമാനക്കമ്പനികള്‍. വിമാന യാത്രാനിരക്ക് മൂന്നു മുതല്‍ അഞ്ച് മടങ്ങ്‌വരെ വര്‍ധിപ്പിച്ചു.
സെപ്തംബര്‍ ഒന്നിന് ഗള്‍ഫ് നാടുകളില്‍ മധ്യവേനല്‍ അവധി കഴിഞ്ഞ് സ്‌കൂളുകള്‍ തുറക്കും. ഇത് മുതലെടുക്കാനാണ് വിമാന കമ്പനികളുടെ നീക്കം. 20മുതല്‍ ബുക്ക് ചെയ്യുന്ന ടിക്കറ്റുകള്‍ക്ക് അമിത നിരക്കാണ് ഈടാക്കുന്നത്. എയര്‍ ഇന്ത്യയും എയര്‍ ഇന്ത്യാ എക്‌സ്പ്രസും ഉള്‍പ്പെടെ ഗള്‍ഫ് നാടുകളിലേക്ക് ഇക്കണോമി ക്ലാസില്‍ 35,000മുതല്‍ 60,000 രൂപവരെയാണ് നിരക്ക് ഉയര്‍ത്തിയത്. നിലവില്‍ 10,000മുതല്‍ 15,000 രൂപ വരെയായിരുന്നു നിരക്ക്. ബിസിനസ് ക്ലാസില്‍ ഒരുലക്ഷം രൂപവരെയാണ് നിരക്ക്. സെപ്തംബര്‍ ഒന്നു മുതല്‍ കേരളത്തിലേക്കുള്ള യാത്രയ്ക്കും അധികനിരക്ക് നല്‍കേണ്ടിവരും. ഇത് ഓണം ആഘോഷിക്കാന്‍ നാട്ടിലെത്തുന്നവരെ ബാധിക്കും.
ഓഗസ്ത് 27 മുതല്‍ സെപ്തംബര്‍ അവസാനംവരെ നെടുമ്പാശേരിയില്‍നിന്ന് ദുബായിലേക്കുള്ള എയര്‍ ഇന്ത്യാനിരക്ക് അമ്പതിനായിരത്തിനു മുകളിലാണ്. കരിപ്പൂരില്‍നിന്നാണ് ഏറ്റവും കൂടുതല്‍ നിരക്ക്. സംസ്ഥാനത്തെ മറ്റ് വിമാനത്താവളങ്ങളെ അപേക്ഷിച്ച് 2000 മുതല്‍ 3000 രൂപ വരെയാണ് അധിക നിരക്ക്. ടിക്കറ്റ് ക്ഷാമം സൃഷ്ടിച്ച് വലിയ നിരക്ക് ഈടാക്കുന്നതായും പരാതിയുണ്ട്.