വടകര: തെരഞ്ഞെടുപ്പ് പ്രചരണം സമാപിക്കുന്ന 24 ന് കേന്ദ്രീകൃത കൊട്ടിക്കലാശം ഒഴിവാക്കാന് വടകര ഡിവൈഎസ്പി വിളിച്ചു ചേര്ത്ത രാഷ്ട്രീയ പാര്ട്ടി നേതാക്കളുടെ യോഗം തീരുമാനിച്ചു. വടകര പോലീസ് സ്റ്റേഷന് പരിധിയിലെ വില്ല്യാപ്പള്ളി ടൗണില് സംഘര്ഷ സാധ്യത കണക്കിലെടുത്ത് യാതൊരു കൊട്ടിക്കലാശവും നടത്തില്ല. വടകര മുനിസിപ്പല് പരിധി, ആയഞ്ചേരി, തിരുവള്ളൂര് എന്നിവിടങ്ങളില് മൂന്ന് മുന്നണികളും
പ്രത്യേകം പ്രത്യേകം കോര്ണര് മീറ്റിങ്ങുകള് മാത്രമേ നടത്താന് പാടുള്ളൂ. പ്രകടനങ്ങള്, ഓപ്പണ് വാഹനങ്ങളിലെ പ്രചരണം, ഡിജെ വാദ്യങ്ങള് എന്നിവ പൂര്ണമായും ഒഴിവാക്കാന് തീരുമാനിച്ചു. 24 ന് വൈകീട്ട് 4 മണിക്ക് ശേഷം സ്ഥാനാര്ഥി വാഹനം ഒഴികെയുള്ളവ പ്രചരണം പൂര്ണമായും അവസാനിപ്പിച്ച് അവരവര്ക്ക് അനുവദിച്ച സ്ഥലങ്ങളില് കോര്ണര് മീറ്റിംഗ് നടത്താവുന്നതാണ്. നാലു മണിക്ക് ശേഷം വാഹനങ്ങള് ഓടിച്ചുള്ള പ്രചരണ പരിപാടി പൂര്ണമായും ഒഴിവാക്കി. മണിയൂര് പഞ്ചായത്തിലെ കുറുന്തോടിയില് യാതൊരു
വിധ പ്രചരണ പരിപാടിയും അനുവദിക്കില്ല. യോഗത്തില് ഡിവൈഎസ്പി കെ.വിനോദ് കുമാര് അധ്യക്ഷത വഹിച്ചു. വടകര സിഐ ടി.പി.സുമേഷ്, എസ്ഐമാരായ കെ.മുരളീധരന്, ധന്യാ കൃഷ്ണന്, രാഷ്ട്രീയ പാര്ട്ടി പ്രതിനിധികളായ ടി.പി.ഗോപാലന്, ടി.പി.ബിനീഷ് (സിപിഎം), സതീശന് കുരിയാടി, സി.പി.വിശ്വനാഥന് (കോണ്ഗ്രസ്), കെ.സി.മുജീബ് റഹ്മാന്, എം.ഫൈസല് (മുസ്ലിം ലീഗ്), പി.പി.വ്യാസന്, ടി.വി.ഭരതന് (ബിജെപി) എന്നിവര് യോഗത്തില് പങ്കെടുത്തു.