എസ്എസ്എല്‍സി: സര്‍ക്കാര്‍ വിദ്യാലയങ്ങള്‍ കൊയ്തത് മിന്നും വിജയം

വടകര: എസ്എസ്എല്‍സി പരീക്ഷയില്‍ വടകര മേഖലയിലെ സര്‍ക്കാര്‍ വിദ്യാലയങ്ങള്‍ കൊയ്തത് മിന്നും വിജയം.
. മുമ്പൊക്കെ ഗവ.സ്‌കൂളുകളുടെ സ്ഥാനം പിറകിലായിരുന്നെങ്കില്‍ പടിപടിയായി സ്ഥിതി മാറി. നൂറു മേനിയുടെ കഥയാണ് ഇപ്പോള്‍ സര്‍ക്കാര്‍ വിദ്യാലയങ്ങളുടേതും.
വടകരയില്‍ എട്ട് ഗവ.സ്‌കൂളുകള്‍ നൂറു മേനി കരസ്ഥമാക്കി. പുത്തൂരിലെ വടകര ഗവ.ഹയര്‍ സെക്കന്ററി സ്‌കൂളില്‍ 118 വിദ്യാര്‍ഥികള്‍ പരീക്ഷ എഴുതിയതില്‍ എല്ലാവരും വിജയിച്ചു. 53 പേര്‍ മുഴുവന്‍ വിഷയങ്ങളിലും എ പ്ലസ് നേടി. പുതുപ്പണം ജെഎന്‍എം ജിവിഎച്ച്എസ്എസില്‍ പരീക്ഷ എഴുതിയ 254 പേരും വിജയിച്ചു. 68 വിദ്യാര്‍ഥികള്‍ മുഴുവന്‍ വിഷയങ്ങളിലും എ പ്ലസ് കരസ്ഥമാക്കി. മണിയൂര്‍ ഗവ.ഹയര്‍ സെക്കന്ററിയില്‍ പരീക്ഷ എഴുതിയ 228 വിദ്യാര്‍ഥികളും വിജയിച്ചപ്പോള്‍ 41 വിദ്യാര്‍ഥികള്‍ എ പ്ലസ് നേട്ടം കൊയ്തു. മടപ്പള്ളി ജിവിഎച്ച്എസ്എസില്‍ 542 വിദ്യാര്‍ഥികളും വിജയിച്ചു. വടകര സംസ്‌കൃതം എച്ച്എസ്എസില്‍ 58 വിദ്യാര്‍ഥികള്‍ പരീക്ഷ എഴുതിയതില്‍ എല്ലാവരും വിജയശ്രീലാളിതരായി. 14 വിദ്യാര്‍ഥികള്‍ മുഴുവന്‍ വിഷയങ്ങളിലും എ പ്ലസ് നേടി. ഓര്‍ക്കാട്ടേരി കെകെഎംജിവിഎച്ച്എസ്എസില്‍ 216 പേരും വിജയിച്ചപ്പോള്‍ 52 വിദ്യാര്‍ഥികള്‍ മുഴുവന്‍ വിഷയങ്ങളിലും എ പ്ലസ് കരസ്ഥമാക്കി. അഴിയൂര്‍ ഗവ.ഹയര്‍ സെക്കന്ററി സ്‌കൂളില്‍ പരീക്ഷയെഴുതിയ 68 വിദ്യാര്‍ഥികളില്‍ മുഴുവന്‍ പേരും തുടര്‍പഠനത്തിന് അര്‍ഹരായി. രണ്ടു പേര്‍ക്ക് ഫുള്‍ എ പ്ലസ്. ചോറോട് ഗവ.ഹയര്‍ സെക്കന്ററിയില്‍ പരീക്ഷയെഴുതിയ 108 വിദ്യാര്‍ഥികളും വിജയിച്ചു. 16 പേര്‍ മുഴുവന്‍ വിഷയങ്ങളിലും എ പ്ലസ് കരസ്ഥമമാക്കി.