വടകര: വ്യാജ ഓണ്ലൈന് ട്രേഡിങ്ങിന്റെ മറവില് വടകരയിലെ ഡോക്ടറുടെ രണ്ടുകോടി പതിനെട്ടുലക്ഷം രൂപ തട്ടിയ
സംഭവത്തില് ഒരാളെ അഹമ്മദാബാദില് നിന്നു കോഴിക്കോട് റൂറല് സൈബര് ക്രൈം പോലീസ് അറസ്റ്റ് ചെയ്തു. അഹമ്മദാബാദ് നരോദ സ്വദേശിയായ ജയദീപ് മിദേഷ്ഭായി(22) യെയാണ് ജില്ല പോലീസ് മേധാവി അരവിന്ദ് സുകുമാറിന്റെ മേല്നോട്ടത്തില് ഇന്സ്പെക്ടര് എം.പി.വിനീഷ് കുമാര് അറസ്റ്റ്ചെയ്തത്. എസ്ഐ വിനോദന്, എസ്സിപിഒ പി.രൂപേഷ്, കെ.എം.വിജു, സിപിഒ ശരത്ചന്ദ്രകുമാര് എന്നിവരടങ്ങിയ സംഘം പ്രതി ജോലിചെയ്തിരുന്ന ത്രിബുവന് ഇന്റസ്ര്ടിയല് എസ്റ്റേറ്റിലെ കമ്പനിയില് നിന്നു സൈബര് സെല്ലിന്റെയും ഗുജറാത്ത് പോലീസിന്റെയും സഹായത്തോടെ സാഹസികമായി കസ്റ്റഡിയില് എടുക്കുകയായിരുന്നു
.പരാതിക്കാരനായ ഡോക്ടര് എം.എ.ഹാരീസിന്റെ നഷ്ടമായ രണ്ടുകോടി പതിനെട്ടുലക്ഷത്തില് ഒരുകോടി രണ്ട് ലക്ഷം രൂപയാണ് പ്രതിയുടെ അക്കൗണ്ടിലേക്ക് എത്തിയിട്ടുള്ളത് . സംഭവത്തില് കൂടുതല് പ്രതികളുടെ പങ്ക് അന്വേഷിച്ച് വരികയാണ്. ബാങ്ക് അക്കൗണ്ടുകളും മൊബൈല് നമ്പറുകളും കേന്ദ്രീകരിച്ചു നടത്തിയ അന്വേഷണത്തിനൊടുവിലാണ് പ്രതിയെ അറസ്റ്റ് ചെയ്തത്. ഈ കേസില് രണ്ട് പേരെ നേരത്തെ അറസ്റ്റ് ചെയ്തിരുന്നു.
എസ്സിപിഒ കെ.ലിനീഷ്കുമാര്, സിപിഒ ബി.എസ് ജിബിന് എന്നിവരും അന്വേഷണ സംഘത്തില് ഉണ്ടായിരുന്നു. വടകര കോടതിയില് ഹാജരാക്കിയ പ്രതിയെ 14 ദിവസത്തേക്ക് റിമാന്റ് ചെയ്തു.