വടകര: ഭരണഘടനയെ നോക്കുകുത്തിയാക്കി ഇന്ത്യയെ മതാധിഷ്ഠിത രാജ്യമാക്കാനുള്ള ശ്രമങ്ങളാണ് രാജ്യത്ത് നടക്കുന്നതെന്ന് 
മുസ്ലിം ലീഗ് നേതാവ് കെ.എന്‍.എ ഖാദര്‍. മതം രാഷ്ട്രീയത്തെ വിഴുങ്ങുന്ന കാലമാണ് കടന്നു പോകുന്നത്. രാമ ക്ഷേത്രത്തിലെ പ്രാണപ്രതിഷ്ഠ പ്രധാനമന്ത്രി നടത്തുകയും പാര്‍ലമെന്റ് മന്ദിരം സന്യാസിമാര്‍ ഉദ്ഘാടനം ചെയ്തതും ഇക്കാലത്താണ്. ഇതൊക്കെ തന്നെയാണ് ഫാസിസത്തിന് ഏറ്റവും വലിയ ഉദാഹരണമെന്നും അദ്ദേഹം കൂട്ടിച്ചേര്‍ത്തു. വടകരയില്‍ മാധ്യമ പ്രവര്‍ത്തകനും 
രാഷ്ട്രീയ സാമൂഹിക പ്രവര്‍ത്തകനുമായ ഐ.വി ബാബു അനുസ്മരണത്തില്‍ ‘ഇന്ത്യന്‍ ഫാസിസത്തിന് പ്രായപൂര്‍ത്തിയായോ’ എന്ന പ്രമേയത്തില്‍ സംസാരിക്കുകയായിരുന്നു കെഎന്‍എ ഖാദര്‍. പി.സി രാജേഷ് അധ്യക്ഷനായി. കെ.കെ രമ എംഎല്‍എ അനുസ്മരണ പ്രഭാഷണം നടത്തി. പ്രഭാഷകന്‍ പ്രമോദ് പുഴങ്കര, ബിജിത്ത് ലാല്‍ എന്നവര്‍ സംസാരിച്ചു.
