വടകര: ഓര്ക്കാട്ടേരി ശിവ-ഭഗവതി ക്ഷേത്ര ഭരണം പിടിച്ചെടുക്കാനുള്ള സംഘപരിവാര്ശക്തികളുടെ നീക്കത്തിനെതിരെ ജനാധിപത്യ-മതനിരപേക്ഷകക്ഷികള് ഒറ്റക്കെട്ടായി രംഗത്ത്. സര്വ കക്ഷികളുടെ നേതൃത്വത്തില് ചൊവ്വാഴ്ച ഓര്ക്കാട്ടേരിയില് 
പ്രകടനവും പൊതുയോഗവും നടക്കുമെന്ന് ക്ഷേത്ര ജീര്ണോദ്ധാരണ കമ്മിറ്റി ഭാരവാഹികള് വാര്ത്താസമ്മേളനത്തില് അറിയിച്ചു. ഈ വര്ഷത്തെ താലപ്പൊലി മഹോത്സവം വലിയ ജനപങ്കാളിത്തതോടെ ഭംഗിയായി നടത്താന് കഴിഞ്ഞു. പക്ഷേ സംഘപരിവാര് ശക്തികള് ബോധപൂര്വം കുഴപ്പം സൃഷ്ടിക്കുകയാണ്. ദിവസങ്ങള്ക്കു മുമ്പാണ് കമ്മിറ്റി ഭാരവാഹികളെ മര്ദിക്കുകയും ക്ഷേത്ര രേഖകള് അടങ്ങിയ മിനുട്സ് തട്ടിപ്പറിക്കുകയും ചെയ്തത്. നാടിന്റെ പൈതൃകമായ മതസൗഹാര്ദ്ദം നിലനിര്ത്തുന്ന ഈ ക്ഷേത്രത്തിന്റെ ഭരണം 
പിടിച്ചെടുക്കാനുള്ള നീക്കമാണ് സംഘപരിവാര്ശക്തികള് നടത്തുന്നത്. ഇതിനെതിരെ നാട് ഒറ്റക്കെട്ടായി രംഗത്തിറങ്ങുകയാണ്. ചൊവ്വാഴ്ച വൈകുന്നേരം നാലിന് ഓര്ക്കാട്ടേരിയില് സര്വകക്ഷി പ്രതിഷേധ സംഗമം നടക്കുമെന്ന് ഇവര് അറിയിച്ചു.
വാര്ത്താസമ്മേളനത്തില് കമ്മിറ്റി വൈസ് പ്രസിഡന്റ് പുതിയെടുത്ത് കൃഷ്ണന്, ജനറല് സെക്രട്ടറി സി.കെ.രാജീവന്, മെമ്പര് എന്.ബാബു എന്നിവര് പങ്കെടുത്തു.
