ബത്തേരി: വടകര ചോറോട് സ്വദേശികളായ കുടുംബം സഞ്ചരിച്ച കാര്‍ ഗുണ്ടല്‍പേട്ടിനു സമീപം അപകടത്തില്‍പ്പെട്ട് ഒമ്പതു വയസുകാരന്‍ മരിച്ചു. വൈക്കിലശ്ശേരി മീത്തലെ 
ചാലില്‍ വീട്ടില്‍ മിഥുന്‍ലാലിന്റെ മകന്‍ ഈഥന്‍ മിഥുന്‍ ലാല്‍ (9) ആണ് മരിച്ചത്. അപകടത്തില്‍ കാറിലുണ്ടായിരുന്ന ഏഴു പേര്‍ക്ക് പരിക്കേറ്റു. മിഥുന്‍ലാല്‍ (37) ഭാര്യ നവ്യ (34), സഹോദരന്‍ നിഥിന്‍ ലാല്‍ (34), ഭാര്യ സോനു (32) ഇഷ കല്യാണി (അഞ്ച്), എസ്ത പാര്‍വതി (നാല്), നയന ലക്ഷ്മി (മൂന്ന്) എന്നിവര്‍ക്കാണ് പരിക്കേറ്റത്. നവ്യയെ കോഴിക്കോട് മെയ്ത്ര ആശുപത്രിയിലും മറ്റുള്ളവരെ ബത്തേരിയിലെ സ്വകാര്യ ആശുപത്രിയിലും പ്രവേശിപ്പിച്ചു. തിങ്കളാഴ്ച വൈകീട്ട് ദേശീയപാതയിലാണ് അപകടമുണ്ടായത്. കുടുംബം സഞ്ചരിച്ച കാര്‍ 
നിയന്ത്രണംവിട്ട് റോഡരികിലെ മരത്തിലിടിച്ച് മറിയുകയായിരുന്നു. കുടുംബം മൈസൂരുവില്‍ നിന്ന് മടങ്ങുന്നതിനിടെയാണ് അപകടം. മരിച്ച ഈഥന്‍ വടകര ഗോകുലം പബ്ലിക് സ്‌കൂളിലെ മൂന്നാം ക്ലാസ് വിദ്യാര്‍ഥിയാണ്. സിപിഎം നേതാവ് എം.സി.ബാലകൃഷ്ണന്റെ ചെറുമകനാണ്. മൃതദേഹം ബത്തേരി താലൂക്ക് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്.
