അഴിയൂര്: ഓട്ടോ ഡ്രൈവറുടെ സത്യസന്ധത യാത്രക്കാരിക്ക് 57,000 രൂപ തിരികെ കിട്ടാന് വഴിയൊരുക്കി. ചോമ്പാലയിലെ ഓട്ടോ ഡ്രൈവര് പി.പി.ഷംസീറാണ് തന്റെ
ഓട്ടോറിക്ഷയില് യാത്രക്കാരി മറന്നുവെച്ച പണമടങ്ങിയ ബാഗ് തിരികെ ലഭ്യമാക്കി മാതൃകയായത്. കഴിഞ്ഞ ദിവസം കുഞ്ഞിപ്പള്ളിയില് നിന്ന് കയറിയ ജാസ്മിന് എന്ന സ്ത്രീയുടെ ബാഗാണ് വാഹനത്തില് മറന്നുവെച്ചത്. ഇവര് മുക്കാളിയില് ഇറങ്ങിയതിന് ശേഷം ഒഞ്ചിയത്തേക്ക് ഓട്ടം പോയിരുന്നു. പിന്നീടാണ് ഷംസീര് ഓട്ടോറിക്ഷയില് ബാഗുള്ള കാര്യം അറിയുന്നത്. വലിയൊരു തുക അടങ്ങിയ ബാഗ് ശ്രദ്ധയില്പ്പെട്ട ഷംസീര് ഉടന് ഇത് ചോമ്പാല പോലീസില് എത്തിക്കുകയായിരുന്നു. തുടര്ന്ന് ഉടമസ്ഥയെ കണ്ടെത്തുകയും സ്റ്റേഷനില് വെച്ച് തുക കൈമാറുകയും ചെയ്തു. സിഐ സേതുനാഥിന്റെ സാന്നിധ്യത്തില് പണമടങ്ങിയ ബാഗ് ഷംസീര് ഉടമക്ക് കൈമാറി. ഷംസീറിന്റെ സത്യസന്ധതയെ പോലീസുദ്യോഗസ്ഥര് അഭിനന്ദിച്ചു.
- Latest
- Trending
