കെഎസ്‌യു പ്രവര്‍ത്തകരെ ജയിലിലടച്ച ആരോഗ്യ മന്ത്രി മാപ്പ് പറയണം: ചാണ്ടി ഉമ്മന്‍

വടകര: കണ്ണൂര്‍ റെയില്‍വേ സ്റ്റേഷനില്‍ ജനാധിപത്യപരമായി നടന്ന കരിങ്കൊടി പ്രതിഷേധത്തിന്റെ പേരില്‍ കെഎസ്‌യു പ്രവര്‍ത്തകരെ ജയിലിലടച്ച ആരോഗ്യ മന്ത്രി മാപ്പ് പറയണമെന്ന് ചാണ്ടി ഉമ്മന്‍ എംഎല്‍എ. തനിക്ക് പരിക്കേറ്റു എന്ന വ്യാജ ആരോപണം ഉന്നയിച്ച് വിദ്യാര്‍ഥികളെ ജയിലിലടയ്ക്കുകയും പിന്നീട് തെളിവില്ലെന്ന് കണ്ട് പോലീസ് തന്നെ കോടതിയില്‍ റിപ്പോര്‍ട്ട് നല്‍കുകയും ചെയ്ത സാഹചര്യത്തില്‍ ആരോഗ്യ മന്ത്രിയുടെ ഭാഗത്ത് നിന്ന് ഇത്തരമൊരു നടപടി വേണമെന്ന് അദ്ദേഹം ആവശ്യപ്പെട്ടു. കരിങ്കൊടി പ്രതിഷേധത്തില്‍ പങ്കെടുത്തതിന് ബോംബേറുണ്ടായ ബിതുല്‍ ബാലന്റെ വീട് സന്ദര്‍ശിച്ച ശേഷം സംസാരിക്കുകയായിരുന്നു അദ്ദേഹം. കരിങ്കൊടി കാണിച്ചതിന്റെ പേരില്‍ ഒരു പ്രവര്‍ത്തകന്റെ വീടിന് ബോംബെറിയുന്നത് കേരള ചരിത്രത്തില്‍ തന്നെ ആദ്യത്തെ സംഭവമാണെന്നും തനിക്ക് രണ്ട് മക്കളുണ്ടെന്ന് വിലപിക്കുന്ന ആരോഗ്യ മന്ത്രി ബിതുലിനും അമ്മയും അച്ഛനും അനുജത്തിയുമുണ്ടെന്ന് മനസ്സിലാക്കിയാല്‍ നന്നായിരിക്കുമെന്നും അദ്ദേഹം ഓര്‍മിപ്പിച്ചു. മന്ത്രിയുടെ വ്യാജ പ്രചാരണത്തിന്റെ ഭാഗമായാണ് ബിതുലിന്റെ വീടിന് നേരെ ബോംബേറുണ്ടായത്. സംഭവത്തില്‍ പിടിയിലായവര്‍ക്ക് സിപിഎമ്മുമായി ബന്ധമില്ലെന്നാണ് കുറ്റ്യാടി എംഎല്‍എ പറയുന്നത്. എന്നാല്‍ ഇവരെ പാര്‍ട്ടിയില്‍ നിന്ന് പുറത്താക്കാന്‍ തയ്യാറാകണമെന്ന് ചാണ്ടി ഉമ്മന്‍ ആവശ്യപ്പെട്ടു. യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി വി.പി.ദുല്‍ഖിഫില്‍, നിയോജക മണ്ഡലം പ്രസിഡന്റ് ബബിന്‍ ലാല്‍, വൈസ് പ്രസിഡണ്ട് അരുണ്‍ മുയോട്, മണ്ഡലം പ്രസിഡന്റ് അജയ് രാമകൃഷ്ണന്‍, കെഎസ്‌യു ഭാരവാഹികളായ നിഷാന്‍ കോട്ടക്കല്‍, അഖില്‍ തിരുവള്ളൂര്‍, വിഷ്ണു.പി തുടങ്ങിയവര്‍ സന്ദര്‍ശന വേളയില്‍ അദ്ദേഹത്തോടൊപ്പമുണ്ടായിരുന്നു.