മന്തരത്തൂരില്‍ ചന്ദനമരങ്ങള്‍ മുറിച്ചു കടത്തി

വടകര: മണിയൂര്‍ പഞ്ചായത്തിലെ മന്തരത്തൂര് വെള്ളറാട് മലയിലും വീട്ടുപറമ്പുകളിലും ചന്ദനമോഷണം. മന്തരത്തൂര് കരുവരാട്ട് കരുണന്റെ വീട്ടുവളപ്പില്‍ നിന്നും വെള്ളറാട് മലയില്‍ കരുവരാട്ട് ദാമോദരന്റെയും മയങ്കളത്തില്‍ മൂസ്സ ഹാജിയുടെയും ഉടമസ്ഥതയിലുള്ള സ്ഥലങ്ങളില്‍ നിന്നും ഇരുട്ടിന്റെ മറവില്‍ ചന്ദന മരങ്ങള്‍ മോഷണം പോയി. കരുവരാട്ട് കരുണന്റെ മുപ്പത് വര്‍ഷം പ്രായമുള്ള ചന്ദന മരമാണ് ബുധനാഴ്ച പുലര്‍ച്ചെ മോഷ്ടിച്ചത്. ശബ്ദം കേട്ട് കരുണന്‍ വീടിന്റെ ടെറസ്സിന് മുകളില്‍ കയറി നോക്കിയപ്പോള്‍ മോഷ്ടാക്കള്‍ പറമ്പിന് മുകള്‍ ഭാഗത്തെ റോഡിലേക്ക് ഓടിപോകുന്നതാണ് കണ്ടത്. സംഭവസ്ഥലത്ത് മുറിക്കാനുപയോഗിച്ച ആയുധങ്ങളും മുറിച്ച് കൊണ്ടുപോയ ചന്ദനത്തിന്റെ കുറച്ച് ഭാഗങ്ങളും കണ്ടത്തി. ഈ ചന്ദന മരത്തിന് കുറച്ച് ദിവസം മുമ്പ് വില്‍പനക്ക് ചോദിച്ച് ആളു വന്നിരുന്നു. ഇതുസംബന്ധിച്ച് കരുണന്‍ വടകര പോലീസില്‍ പരാതി നല്‍കി.