വള്ളിയാട്: വള്ളിയാട് എംഎല്‍പി സ്‌കൂളില്‍ ഈ വര്‍ഷത്തെ പ്രവേശനോത്സവം വര്‍ണാഭമായി. വൈവിധ്യമാര്‍ന്ന
പരിപാടികളാണ് ആദ്യദിവസം നടന്നത്. വാര്‍ഡ് മെമ്പര്‍ അബ്ദുറഹ്മാന്‍ നവാഗതരെ കിരീടം അണിയിച്ചു. പഠനോപകരണ കിറ്റ് വിതരണം സ്‌കൂള്‍ ഹെഡ്മിസ്ട്രസ് ജസ്‌ന എ.ആര്‍ നിര്‍വഹിച്ചു. ശാസ്ത്ര പരീക്ഷണങ്ങള്‍, ഒറിഗാമി നിര്‍മാണം തുടങ്ങി പേശി വികാസവും വിജ്ഞാന തൃഷ്ണയും ഉണര്‍ത്തുന്ന പ്രവര്‍ത്തനങ്ങള്‍ കുട്ടികളില്‍ കൗതുകം ഉണര്‍ത്തി. റീയൂസ് ഹീറോസ് റിയല്‍ ഹീറോസ് പദ്ധതി പ്രാവര്‍ത്തികമാക്കുന്നതിന് ഭാഗമായുള്ള 
പ്രവര്‍ത്തനങ്ങള്‍ സ്‌കൂളില്‍ നടന്നു. പ്രകൃതി സംരക്ഷണത്തിന്റെ ഭാഗമായി, ഉപയോഗിച്ച് പഴകിയ ബാഗുകള്‍, ചെരുപ്പ് എന്നിവയുമായി എത്തിയ കുട്ടികള്‍ക്ക് പ്രത്യേക പ്രോത്സാഹനം നല്‍കി. ‘പുനരുപയോഗം അഭിമാനമാണ്’ എന്ന ആശയം ഇളം മനസ്സുകളിലും സമൂഹത്തിലും എത്തിക്കുന്നതിനുള്ള പ്രവര്‍ത്തനങ്ങള്‍ നടപ്പിലാക്കിയത് ശ്രദ്ധേയമായി.
