നാടോടി സ്ത്രീ തട്ടിക്കൊണ്ടുപോയ നാലു വയസുകാരിയെ കണ്ടെത്തി; തുണയായത് കെഎസ്ആര്‍ടിസി കണ്ടക്ടറുടെ ജാഗ്രത

കൊല്ലം: കൊല്ലത്ത് നിന്നു നാടോടി സ്ത്രീ തട്ടിക്കൊണ്ടുപോയ നാല് വയസുകാരിയെ കണ്ടെത്തി. കെഎസ്ആര്‍ടിസി കണ്ടക്ടറുടെ ജാഗ്രതയാണ് ഇതിന് തുണയായത്. കുട്ടിയെ തട്ടിക്കൊണ്ടുപോയ കോയമ്പത്തൂര്‍ സ്വദേശി ദേവിയെ കൊല്ലം ഈസ്റ്റ് പോലീസ് കസ്റ്റഡിയിലെടുത്തു. തിരുവനന്തപുരത്തുനിന്ന് തൃശൂരിലേക്ക് പോകുന്ന കെഎസ്ആര്‍ടിസിയില്‍ ചെങ്ങന്നൂര്‍ ഡിപ്പോയിലാണ് നാടകീയ സംഭവങ്ങളുണ്ടായത്.
അടൂരില്‍ നിന്നാണ് കുട്ടിയെയും കൊണ്ട് സ്ത്രീ ബസില്‍ കയറിയത്. ബസില്‍ കയറിയ ഉടന്‍ കുട്ടി ഓടിച്ചെന്ന് കണ്ടക്ടര്‍ അനീഷിന്റെ കൈയില്‍ പിടിച്ചു. കുട്ടി കണ്ടക്ടറുടെ സീറ്റിനരികില്‍ നിന്ന് മാറാതെ നിന്നു. കൂടെയുളള സ്ത്രീ തമിഴും കുട്ടി മലയാളവും സംസാരിക്കുന്നത് കണ്ടപ്പോള്‍ അനീഷിന് സംശയമായി. ടിക്കറ്റ് എടുക്കാന്‍ കാശില്ലെന്നുകൂടി സ്ത്രീ പറഞ്ഞതോടെ കുട്ടിയെ തട്ടിക്കൊണ്ടുവന്നതാണെന്ന് ഉറപ്പായ അനീഷ് ബസ് പന്തളം പൊലീസ് സ്റ്റേഷനിലേക്ക് എത്തിക്കുകയും ഇരുവരെയും പോലീസില്‍ ഏല്‍പിക്കുകയുമായിരുന്നു.
പത്തനാപുരം കുന്നിക്കോട് സ്വദേശിയുടെ മകളെയാണ് കാണാതായത്. മാനസിക വെല്ലുവിളി നേരിടുന്ന മാതാവുമായി കുട്ടി കഴിഞ്ഞ ദിവസം പുറത്തുപോയിരുന്നു. തുടര്‍ന്ന് കൊല്ലം കെഎസ്ആര്‍ടിസി ബസ് സ്റ്റാന്റില്‍ നിന്നാണ് കുട്ടിയെ നാടോടി സ്ത്രീ തട്ടിയെടുത്തത്.