കോട്ടയത്ത് ലോറിയും ജീപ്പും കൂട്ടിയിടിച്ചു രണ്ടു മരണം

കോട്ടയം: നാട്ടകത്ത് എംസി റോഡില്‍ ലോറിയും ജീപ്പും കൂട്ടിയിടിച്ചു രണ്ട് പേര്‍ മരിച്ചു. ജീപ്പിലുണ്ടായിരുന്ന തൊടുപുഴ സ്വദേശിയായ സനുഷും ബിഹാറില്‍ നിന്നുള്ള തൊഴിലാളി കനയയ്യുമാണ് മരിച്ചത്. ഇവര്‍ക്കൊപ്പമുണ്ടായിരുന്ന മുന്ന് പേരെ ഗുരുതര പരിക്കുകളോടെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ഇന്നു പുലര്‍ച്ചെയാണ് അപകടമുണ്ടായത്.
ചങ്ങനാശ്ശേരി ഭാഗത്തേക്ക് പോകുകയായിരുന്ന ലോറിയിലേക്ക് എതിരെ വന്ന ജീപ്പ് ഇടിച്ച് കയറുകയായിരുന്നു. ജീപ്പ് ഡ്രൈവര്‍ ഉറങ്ങിപ്പോയതിനെ തുടര്‍ന്ന് നിയന്ത്രണം വിട്ടതാണെന്നാണ് നിഗമനം. അപകടത്തെ തുടര്‍ന്ന് ഏറെ നേരം എംസി റോഡില്‍ ഗതാഗത കുരുക്കുണ്ടായി. ഫയര്‍ഫോഴ്‌സും പോലീസും ചേര്‍ന്ന് അപകടത്തില്‍പ്പെട്ട വാഹനങ്ങള്‍ റോഡില്‍ നിന്ന് നീക്കിയതിന് ശേഷമാണ് ഗതാഗതം പുനസ്ഥാപിച്ചത്.
രണ്ട് പേരുടേയും മൃതദേഹം കോട്ടയം മെഡിക്കല്‍ കോളജ് ആശുപത്രിലേക്ക് മാറ്റി. പരിക്കേറ്റ മൂന്ന് പേരും മെഡിക്കല്‍ കോളജ് ആശുപത്രിയില്‍ ചികിത്സയിലാണ്. സംഭവത്തില്‍ ചിങ്ങവനം പോലീസും മോട്ടോര്‍ വാഹന വകുപ്പും അന്വേഷണം തുടങ്ങി.