സ്‌കൂട്ടര്‍ യാത്രികരെ ഇടിച്ച് കടന്നു കളഞ്ഞ കാറും ഡ്രൈവറും പിടിയില്‍

വടകര: മേമുണ്ട റൂട്ടില്‍ കുറുമ്പയില്‍ വെച്ച് സ്‌കൂട്ടറില്‍ സഞ്ചരിക്കുകയായിരുന്ന രണ്ട് യുവാക്കളെ ഇടിച്ച് വീഴ്ത്തി നിര്‍ത്താതെ പോയ കാറും ഡ്രൈവറും പോലീസ് പിടിയില്‍. കല്ലാച്ചി സ്വദേശി മുഹമ്മദ് മുഷായേലി (22) നെയും ഇയാള്‍ ഓടിച്ച KL18T8000 നമ്പര്‍ കാറുമാണ് വടകര പോലീസ് കസ്റ്റഡിയിലെടുത്തത്. ഇക്കഴിഞ്ഞ 14 ന് വൈകിട്ട് 5.25 നാണ് സംഭവം. അരൂരിലെ ചെങ്ങണംകോട്ട് ടി.കെ സുധി (35), തോലേരി സജിത്ത് (35) എന്നിവര്‍ സഞ്ചരിച്ച സ്‌കൂട്ടറിലാണ് കാര്‍ ഇടിച്ചത്. സംഭവത്തില്‍ സ്‌കൂട്ടര്‍ യാത്രക്കാരനായ സുധി സാരമായി പരുക്ക് പറ്റി ഇപ്പോഴും ചികിത്സയിലാണ്. വടകരയില്‍ ഡോക്ടറെ കണ്ട് വീട്ടിലേക്ക് പോകുമ്പോഴാണ് കാര്‍ ഇടിച്ചത്. സിസിസിടിവി കേന്ദ്രീകരിച്ച് പോലീസ് നടത്തിയ അന്വേഷണത്തിലാണ് കാര്‍ പിടി കൂടാനായത്. 40 ഓളം സിസിടിവികള്‍ പരിശോധിച്ചു എസ്‌ഐമാരായ രഞ്ജിത്ത്, മഹേഷ്, എഎസ്‌ഐ ശ്രീജിത്ത്, സിപിഒ ഷിബിന്‍ എന്നിവരടങ്ങിയ പോലീസ് സംഘമാണ് കേസ് അന്വേഷിച്ചത്.