ഭാരതപ്പുഴയില്‍ ഒഴുക്കില്‍പെട്ട് കുട്ടികളടക്കം നാലുപേര്‍ മരിച്ചു

തൃശൂര്‍: ഭാരതപ്പുഴയില്‍ ഒഴുക്കില്‍പെട്ട് നാല് പേര്‍ക്ക് ദാരുണാന്ത്യം. ചെറുതുരുത്തി സ്വദേശികളായ ഓടക്കല്‍ വീട്ടില്‍ കബീര്‍ (47), ഭാര്യ ഷാഹിന (35), മകള്‍ സെറ (10), ഷാഹിനയുടെ സഹോദരീ പുത്രന്‍ ഫുവാദ് സനിന്‍ (12) എന്നിവരാണ് മരിച്ചത്. ഇന്ന് വൈകിട്ട് 5.30ഓടെ ചെറുതുരുത്തിയിലാണ് സംഭവം. ഒഴുക്കില്‍പെട്ട ഷാഹിനയെ രക്ഷപ്പെടുത്തി ആശുപത്രിയിലെത്തിച്ചെങ്കിലും മരിച്ചു. പിന്നീട് നടത്തിയ തെരച്ചിലിലാണ് ഫുവാദിന്റെയും കബീറിന്റെയും മൃതദേഹം കണ്ടെത്തിയത്. രാത്രി 8.15ഓടെ സെറയുടെ മൃതദേഹവും കണ്ടെത്തി. മൃതദേഹങ്ങള്‍ ആശുപത്രിയിലേക്ക് മാറ്റി.
മരിച്ച ഫുവാദ് സനിന്‍ ചേലക്കര സ്വദേശിയായ ജാഫര്‍-ഷഫാന ദമ്പതികളുടെ മകനാണ്. പങ്ങാരപ്പിള്ളി സെന്റ് ജോസഫ് എച്ച്.എസ്.എസ് വിദ്യാര്‍ഥിയാണ്. ഭാരതപ്പുഴയുടെ പൈങ്കുളം ശ്മശാനം കടവിനോട് ചേര്‍ന്ന തീരത്ത് കളിക്കുന്നതിനിടെ സെറയും ഫുവാദും വെള്ളത്തിലേക്ക് വീഴുകയായിരുന്നു. ഇവരെ രക്ഷിക്കാന്‍ ഇറങ്ങിയതായിരുന്നു കബീറും ഷാഹിനയും. ഇരുവരും ഒഴുക്കില്‍പ്പെടുകയായിരുന്നു എന്ന് ദൃക്‌സാക്ഷികള്‍ പറഞ്ഞു.