മലപ്പുറത്ത് വീണ്ടും ജീവനെടുത്ത് കാട്ടാന; ആടിനെ മേയ്ക്കാന്‍ പോയ വീട്ടമ്മ കൊല്ലപ്പെട്ടു

മലപ്പുറം: മൂത്തേടത്ത് കാട്ടാന ആക്രമണത്തില്‍ വീട്ടമ്മ കൊല്ലപ്പെട്ടു. എടക്കരയിലാണ് സംഭവം. മൂത്തേടം ഉച്ചക്കുളം കോളനിയിലെ സരോജിനി എന്ന നീലിയാണ് ആനയുടെ ആക്രമണത്തില്‍ മരിച്ചത്. ഇന്ന് പതിനൊന്നു മണിയോടെയുണ്ടായ ആക്രമണത്തില്‍ ഗുരുതരമായി പരിക്കേറ്റ ഇവരെ നിലമ്പൂര്‍ ജില്ലാആശുപത്രിയിലേക്ക് കൊണ്ടുപോയെങ്കിലും ജീവന്‍ രക്ഷിക്കാനായില്ല.
വനമേഖലയുമായി ചേര്‍ന്ന് നില്‍ക്കുന്ന പ്രദേശമാണ് മുത്തേടം പഞ്ചായത്തിലെ ഉച്ചക്കുളം കോളനി. രണ്ടാഴ്ചയ്ക്കുള്ളില്‍ ഈ മേഖലയില്‍ കാട്ടാന ആക്രമണത്തില്‍ കൊല്ലപ്പെടുന്ന രണ്ടാമത്തെ ആളാണ് സരോജിനി. ജനുവരി നാലിനാണ് കരുളായി പൂച്ചപ്പാറ സ്വദേശി മണി കാട്ടാന ആക്രമണത്തില്‍ കൊല്ലപ്പെട്ടത്. മലയോര മേഖലയില്‍ വന്യജീവി അക്രമണം വലിയ ചര്‍ച്ചയായിരിക്കെയാണ് വീണ്ടും മരണം. ആടിനെ മേയ്ക്കാനും വനവിഭവങ്ങള്‍ ശേഖരിക്കാനും സ്ഥിരം പോകുന്ന വ്യക്തിയാണ് നീലി. എന്നാല്‍ ഉള്‍ക്കാട്ടിലേക്ക് അധികം പോകാതെ തന്നെ ആന ആക്രമിക്കുകയായിരുന്നു. പരിക്കേറ്റ ഇവരെ കാട്ടില്‍ നിന്നു ചുമന്ന് പുറത്തെത്തിച്ച് തുടര്‍ന്ന് വാഹനത്തില്‍ ആശുപത്രിയിലേക്ക് കൊണ്ടുപോവുകയായിരുന്നു. അപ്പോഴേക്കും മരണം സംഭവിച്ചിരുന്നു.