നാളെ മുതല്‍ കൊയിലാണ്ടിയില്‍ ഫുട്‌ബോള്‍ വിരുന്ന്

കൊയിലാണ്ടി: 43-ാമത് എകെജി ഫുട്‌ബോള്‍ മേള ജനുവരി 12 മുതല്‍ 26 വരെ കൊയിലാണ്ടി സ്‌പോര്‍ട്‌സ് കൗണ്‍സില്‍ സ്റ്റേഡിയത്തിലെ എന്‍.കെ ചന്ദ്രന്‍ മെമ്മോറിയല്‍ ഫ്‌ലെഡ്‌ലൈറ്റ് ഗ്രൗണ്ടില്‍ നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. 12 ന് വൈകീട്ട് ആറിന് മുന്‍ എക്‌സൈസ് മന്ത്രി ടി.പി.രാമകൃഷ്ണന്‍ ഉദ്ഘാടനം ചെയ്യും. ഈ വര്‍ഷത്തെ എകെജി ഫുട്‌മ്പോള്‍ മേളയില്‍ മൂന്ന് ടൂര്‍ണമെന്റുകളിലായി 32 ടീമുകള്‍ മത്സരത്തിനിറങ്ങും. എ.കെ.ജി മെമ്മോറിയല്‍ ട്രാഫിക്കായുള്ള പ്രധാന ടൂര്‍ണമെന്റിന് പുറമെ അണ്ടര്‍17 ടൂര്‍ണമെന്റും പ്രാദേശിക ടീമുകളെ ഉള്‍പ്പെടുത്തിയുള്ള ടൂര്‍ണമെന്റും നടക്കം.
അണ്ടര്‍ 17 വിഭാഗത്തിനായുള്ള ടൂര്‍ണമെന്റ് ജനുവരി 18 ന് വൈകീട്ട് 5 മണിക്ക് കെ.എം സച്ചിന്‍ ദേവ് എംഎല്‍എ ഉദ്ഘാടനം ചെയ്യും. പ്രാദേശിക ടീമുകളെ ഉള്‍പ്പെടുത്തി സംഘടിപ്പിക്കുന്ന ടൂര്‍ണമെന്റ് ഉദ്ഘാടനം 22 ന് വൈകീട്ട് 5 മണിക്ക് ജില്ലാ സ്‌പോര്‍ട്‌സ് കൗണ്‍സിന്‍ പ്രസിഡണ്ട് ഒ രാജഗോപാല്‍ നിര്‍വ്വഹിക്കും.
ഫുട്‌ബോള്‍ മേളയുടെ സമാപനം 26ന് വൈകീട്ട് 6 മണിക്ക് പൊതുമരാമത്ത്-ടൂറിസം മന്ത്രി പി.എ.മുഹമ്മദ് റിയാസ് ഉദ്ഘാടനം ചെയ്യും. ഫുട്‌ബോള്‍ താരം സി.കെ.വിനീത് മുഖ്യാതിഥിയായി പങ്കെടുക്കും. കാനത്തില്‍ ജമീല എംഎല്‍എ വിജയികള്‍ക്കു ട്രോഫികള്‍ വിതരണം ചെയ്യും.
വാര്‍ത്താസമ്മേളനത്തില്‍ സ്വാഗത സംഘം ജനറല്‍ കണ്‍വീനര്‍ സി.കെ.മനോജ്, പി.വിശ്വന്‍, എ.പി.സുധീഷ് എന്നിവര്‍ പങ്കെടുത്തു.