കോഴിക്കോട്: നിയമസഭ തെരഞ്ഞെടുപ്പുമായി ബന്ധപ്പെട്ട് ജില്ലാ കളക്ടര് സ്നേഹില് കുമാര് സിങ്ങിന്റെ അധ്യക്ഷതയില് രാഷ്ട്രീയ പാര്ട്ടി പ്രതിനിധികളുടെ യോഗം ചേര്ന്നു. 
തെരഞ്ഞെടുപ്പ് പ്രക്രിയ വിജയകരമായി പൂര്ത്തിയാക്കാന് എല്ലാ രാഷ്ട്രീയ പാര്ട്ടികളും സഹകരിക്കണമെന്ന് കളക്ടര് അഭ്യര്ഥിച്ചു.
തെരഞ്ഞെടുപ്പ് പ്രചാരണം നീതിയുക്തമാക്കാന് ആന്റി ഡിഫെയ്സ്മെന്റ് സ്ക്വാഡ് പരിശോധന നടത്തി നടപടി സ്വീകരിക്കും. 40 ലക്ഷം രൂപയാണ് ഒരു സ്ഥാനാര്ഥിക്ക് പരമാവധി ചെലവാക്കാവുന്ന തുക. സ്ഥാനാര്ഥികള് ഇതില് കൂടുതല് ചെലവിടുന്നത് 
അയോഗ്യതക്ക് കാരണമാകും. പ്രചാരണങ്ങള്ക്ക് ആരാധനാലയങ്ങള് ഉപയോഗിക്കരുത്. മാതൃകാ പെരുമാറ്റച്ചട്ടങ്ങള് കൃത്യമായി പാലിക്കണമെന്നും കളക്ടര് പറഞ്ഞു.
തെരഞ്ഞെടുപ്പുമായി ബന്ധപ്പെട്ട റാലികള്, പൊതുയോഗങ്ങള്, റോഡ് ഷോകള് തുടങ്ങിയവ നടത്തുന്നതിനും ഉച്ചഭാഷിണി, വാഹനങ്ങള് തുടങ്ങിയവ ഉപയോഗിക്കുന്നതിനും മുന്കൂര് അനുമതി വാങ്ങണം. അനുമതിക്കായി തെരഞ്ഞെടുപ്പ് കമ്മീഷന്റെ ഏകജാലക പോര്ട്ടലായ 
സുവിധ വഴി ഓണ്ലൈനായി അപേക്ഷിക്കാം. 85 വയസ് പൂര്ത്തിയായ വയോധികര്ക്കും 40 ശതമാനത്തിലധികം ശാരീരിക വൈകല്യം ഉള്ളവര്ക്കും വീട്ടിലിരുന്ന് വോട്ട് ചെയ്യാനുള്ള അവസരമുണ്ട്. ഇതിനുള്ള അപേക്ഷകള് ആര്ഒ ഓഫീസില് എത്തിക്കാന് സൗകര്യം ഒരുക്കണമെന്നും കളക്ടര് അറിയിച്ചു.
കളക്ടറുടെ ചേംബറില് ചേര്ന്ന യോഗത്തില് സീനിയര് ഫിനാന്സ് ഓഫീസര് കെ.പി മനോജന്, രാഷ്ട്രീയപാര്ട്ടി പ്രതിനിധികള് തുടങ്ങിയവര് പങ്കെടുത്തു.
