മസ്കത്ത്: നോര്‍ക്ക റൂട്ട്സ് പ്രവാസി രക്ഷ ഇന്‍ഷുറന്‍സ് പദ്ധതി അവതരിപ്പിച്ചു. പ്രവാസികള്‍ക്കും വിദേശത്ത് അവരോടൊപ്പം കഴിയുന്ന കുടുംബാംഗങ്ങള്‍ക്കും ഇന്‍ഷുറന്‍സ് പദ്ധതിയുടെ ആനുകൂല്യം ലഭിക്കും. പതിനെട്ടിനും അറുപതിനും ഇടയില്‍ പ്രായമുള്ള പ്രവാസികളും അവര്‍ക്കൊപ്പം വിദേശത്ത് കഴിയുന്ന കുടുംബാംഗങ്ങളുമാണ് പദ്ധതിയുടെ പരിധിയില്‍ വരുക. ഒരുവര്‍ഷത്തേക്ക് 550 രൂപയാണ് പ്രീമിയം അടയ്‌ക്കേണ്ടത്. രോഗങ്ങള്‍ക്ക് ഒരുലക്ഷം രൂപ വരെ ഇന്‍ഷുറന്‍സ് സംരക്ഷണം ലഭിക്കും.
ന്യൂ ഇന്ത്യ അഷ്വറന്‍സ് കമ്ബനിയുമായി ചേര്‍ന്നാണ് നോര്‍ക്ക പദ്ധതി നടപ്പാക്കുന്നത്.നോര്‍ക്ക റൂട്‌സി‍െന്‍റ www.norkaroots.org എന്ന വെബ്‌സൈറ്റിലെ സര്‍വിസ് വിഭാഗത്തില്‍ പ്രവാസി ഐഡി കാര്‍ഡ് സെക്ഷനില്‍ നിന്നും ഈ പദ്ധതിയില്‍ ഓണ്‍ലൈനായി ചേരാം. ഫീസും ഓണ്‍ലൈനായി അടയ്ക്കാം. വിശദ വിവരങ്ങള്‍ നോര്‍ക്ക റൂട്ട്സ് വെബ്‌സൈറ്റിലും norka.raksha@gmail.com എന്ന ഇ-മെയില്‍ വഴിയും ലഭിക്കും. 91-417-2770543, 91-471-2770528 എന്നീ ഫോണ്‍ നമ്ബറുകളിലും 18004253939, 00918802012345 (വിദേശത്തുനിന്നും മിസ്ഡ് കാള്‍ സേവനം) എന്നീ ടോള്‍ഫ്രീ നമ്ബറുകളിലും വിവരങ്ങള്‍ ലഭിക്കും. പ്രവാസി സമൂഹം നേരിടുന്ന പ്രധാന പ്രശ്‌നങ്ങളിലൊന്നാണ് ആരോഗ്യസംരക്ഷണമെന്നും അതു കണക്കിലെടുത്താണ് ഈ പദ്ധതി നടപ്പാക്കുന്നതെന്നും നോര്‍ക്ക അറിയിച്ചു.
